- Updated: June 10, 2023 11:50 PM
ਬਰੇਲੀ ਅਤੇ ਉਸ ਦੇ ਆਲੇ-ਦੁਆਲੇ ਰਹਿਣ ਵਾਲੇ ਲੋਕਾਂ ਨੂੰ ਇਕ ਨਵਾਂ ਤੋਹਫਾ ਮਿਲਿਆ ਹੈ। ਉੱਤਰ ਪ੍ਰਦੇਸ਼ ਦੇ ਬਰੇਲੀ ਸ਼ਹਿਰ ਵਿੱਚ ਇੱਜ਼ਤਨਗਰ ਰੇਲਵੇ ਸਟੇਸ਼ਨ ਕੋਲ ਦੇਸ਼ ਦਾ ਪਹਿਲਾ ਦੋ ਕੋਚ ਵਾਲਾ ਰੇਲ ਕੈਫੇ ਸ਼ੁਰੂ ਕਰ ਦਿੱਤਾ ਗਿਆ ਹੈ। ਇਹ ਰੈਸਟੋਰੈਂਟ ਰੇਲ ਆਨ ਵ੍ਹੀਲਜ਼ ਦੀਆਂ ਬੋਗੀਆਂ ਵਿੱਚ ਖੋਲ੍ਹਿਆ ਗਿਆ ਹੈ। ਇਸ ਰੇਲ ਕੈਫ਼ੇ ਦਾ ਉਦਘਾਟਨ ਸੰਸਦ ਮੈਂਬਰ ਅਤੇ ਸਾਬਕਾ ਕੇਂਦਰੀ ਮੰਤਰੀ ਸੰਤੋਸ਼ ਕੁਮਾਰ ਗੰਗਵਾਰ ਵਲੋਂ ਕੀਤਾ ਗਿਆ ਹੈ। ਬਰੇਲੀ ਦੇ ਇਸ ਰੇਲ ਕੈਫੇ ਤੋਂ ਲੋਕਾਂ ਨੂੰ 24 ਘੰਟੇ ਭੋਜਨ ਅਤੇ ਸਨੈਕਸ ਆਦਿ ਦੀ ਸਹੁਲਤ ਮਿਲੇਗੀ।
ਦੱਸ ਦੇਈਏ ਕਿ ਇਕ ਰੇਲ ਕੋਚ ਵਿੱਚ ਬਹੁਤ ਸਾਰੇ ਰੈਸਟੋਰੈਂਟ ਖੁੱਲ੍ਹ ਚੁੱਕੇ ਹਨ ਪਰ ਬਰੇਲੀ ਵਿੱਚ ਇਹ ਪਹਿਲਾ ਅਜਿਹਾ ਰੇਲ ਕੈਫੇ ਹੈ ਜੋ ਦੋ ਡੱਬਿਆਂ ਵਿੱਚ ਖੁੱਲ੍ਹਿਆ ਗਿਆ ਹੈ। ਇਸ ਰੇਲ ਕੈਫੇ ਵਿੱਚ ਆਉਣ ਵਾਲੇ ਲੋਕ ਹੁਣ ਸ਼ੌਕ ਨਾਲ ਸੈਲਫੀ ਲੈ ਸਕਦੇ ਹਨ, ਕਿਉਂਕਿ ਇਥੇ ਇਕ ਸੈਲਫੀ ਪੁਆਇੰਟ ਵੀ ਬਣਾਇਆ ਗਿਆ ਹੈ। ਟਰੇਨ ਦੀ ਬੋਗੀ ਦੀ ਬਾਹਰੀ ਦਿੱਖ 'ਚ ਬਿਨਾਂ ਕਿਸੇ ਬਦਲਾਅ ਦੇ ਬਣੇ ਇਸ ਰੈਸਟੋਰੈਂਟ 'ਚ ਖਾਣਾ ਖਾਂਦੇ ਸਮੇਂ ਰੇਲ ਯਾਤਰਾ ਦਾ ਅਨੁਭਵ ਲਿਆ ਜਾ ਸਕਦਾ ਹੈ।
ਮਿਲੀ ਜਾਣਕਾਰੀ ਅਨੁਸਾਰ ਪੁਰਾਣੇ ਰੇਲ ਕੋਚ ਤੋਂ ਤਿਆਰ ਕੀਤੇ ਗਏ ਇਸ ਰੈਸਟੋਰੈਂਟ 'ਤੇ ਕਰੀਬ 25 ਲੱਖ ਰੁਪਏ ਤੱਕ ਦਾ ਖ਼ਰਚਾ ਆਇਆ ਹੈ। ਇਸ ਵਿੱਚ ਦੋ ਬਲਾਕ ਬਣਾਏ ਗਏ ਹਨ-ਇੱਕ ਬਲਾਕ ਵਿੱਚ ਜਿੱਥੇ ਜਨਮ ਦਿਨ ਦੀ ਪਾਰਟੀ, ਕਿਟੀ ਪਾਰਟੀ ਅਤੇ ਹੋਰ ਸਮਾਗਮਾਂ ਦਾ ਪ੍ਰਬੰਧ ਕੀਤਾ ਜਾਵੇਗਾ, ਉੱਥੇ ਹੀ ਦੂਜੇ ਬਲਾਕ ਵਿੱਚ ਕੌਫੀ ਸ਼ਾਪ ਅਤੇ ਰੈਸਟੋਰੈਂਟ ਚੱਲਣਗੇ।
ਇਸ ਰੇਲ ਕੈਫੇ ਤੋਂ ਮਿਲਣ ਵਾਲੀਆਂ ਖਾਣ-ਪੀਣ ਦੀਆਂ ਚੀਜ਼ਾਂ ਦੇ ਭਾਅ ਇਕ ਸਾਮਾਨ ਰੱਖੇ ਜਾਣਗੇ। ਇਸ ਰੇਲ ਕੈਫੇ ਵਿੱਚ ਲੋਕ ਉੱਤਰੀ ਭਾਰਤੀ ਤੋਂ ਇਲਾਵਾ ਕਾਂਟੀਨੈਂਟਲ, ਚੀਨੀ, ਇਤਾਲਵੀ, ਮੈਕਸੀਕਨ, ਮੁਗਲਾਈ ਅਤੇ ਥਾਈ ਪਕਵਾਨਾਂ ਦਾ ਆਨੰਦ ਲੈ ਸਕਦੇ ਹਨ।