- Updated: June 26, 2023 04:30 PM
ਮੱਧ ਇੰਗਲੈਂਡ ਵਿੱਚ ਸਾਲ 2022 ਵਿੱਚ ਕਿਰਾਏ ਦੇ ਭੁਗਤਾਨ ਦੇ ਤਰੀਕੇ ਨੂੰ ਲੈ ਕੇ ਹੋਈ ਬਹਿਸ ਤੋਂ ਬਾਅਦ ਸਿੱਖ ਟੈਕਸੀ ਡਰਾਈਵਰ ਦਾ ਕਤਲ ਕਰਨ ਦੇ ਮਾਮਲੇ ਵਿਚ ਇੱਕ ਵਿਅਕਤੀ ਨੂੰ ਦੋਸ਼ੀ ਠਹਿਰਾਇਆ ਗਿਆ ਹੈ। ਟੋਮਾਜ਼ ਮਾਰਗੋਲ (36) ਨੂੰ ਅਕਤੂਬਰ 2022 ਵਿੱਚ ਹੋਈ ਇੱਕ ਘਟਨਾ ਦੌਰਾਨ ਅਣਖ ਸਿੰਘ (59) ਦੇ ਕਤਲ ਲਈ ਇਸ ਹਫ਼ਤੇ ਵੁਲਵਰਹੈਂਪਟਨ ਕਰਾਊਨ ਕੋਰਟ ਵਿੱਚ ਦੋਸ਼ੀ ਮੰਨਿਆ ਗਿਆ। ਉਸ ਨੂੰ ਅਗਲੇ ਮਹੀਨੇ ਇਸ ਅਪਰਾਧ ਲਈ ਸਜ਼ਾ ਸੁਣਾਈ ਜਾਵੇਗੀ।
ਵੁਲਵਰਹੈਂਪਟਨ ਪੁਲਸ ਸੀ.ਆਈ.ਡੀ. ਦੇ ਡਿਟੈਕਟਿਵ ਇੰਸਪੈਕਟਰ (ਡੀ.ਆਈ.) ਮਿਸ਼ੇਲ ਥਰਗੁਡ ਨੇ ਕਿਹਾ, "ਇਹ ਹਿੰਸਾ ਦੀ ਇੱਕ ਬੇਤੁਕੀ ਅਤੇ ਦੁਖਦਾਈ ਕਾਰਵਾਈ ਸੀ।" ਉਨ੍ਹਾਂ ਅੱਗੇ ਕਿਹਾ, "ਸਿੰਘ ਇੱਕ ਚੰਗੇ ਚਰਿੱਤਰ ਵਾਲੇ ਕਾਨੂੰਨ ਦੀ ਪਾਲਣਾ ਕਰਨ ਵਾਲੇ ਵਿਅਕਤੀ ਸਨ ਜੋ ਸਿਰਫ ਆਪਣਾ ਕੰਮ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਸਨ। ਇਸ ਮੁਸ਼ਕਲ ਸਮੇਂ ਵਿੱਚ ਸਾਡੀ ਹਮਦਰਦੀ ਸਿੰਘ ਦੇ ਪਰਿਵਾਰ ਨਾਲ ਹੈ।" ਅਦਾਲਤ ਨੇ ਅਣਖ ਸਿੰਘ ਦੇ 30 ਅਕਤੂਬਰ, 2022 ਦੀ ਸਵੇਰ ਨੂੰ ਨਾਈਨ ਐਲਮਜ਼ ਲੇਨ ਵਿਖੇ ਗੰਭੀਰ ਰੂਪ ਨਾਲ ਜ਼ਖ਼ਮੀ ਪਾਏ ਜਾਣ ਅਤੇ ਫਿਰ ਮੌਕੇ 'ਤੇ ਹੀ ਉਨ੍ਹਾਂ ਦੀ ਮੌਤ ਹੋਣ ਦੇ ਮਾਮਲੇ ਦੀ ਸੁਣਵਾਈ ਕੀਤੀ। ਸਿੰਘ ਨੇ ਮਾਰਗੋਲ ਨੂੰ ਆਪਣੀ ਟੈਕਸੀ ਵਿੱਚ ਬਿਠਾਇਆ ਸੀ, ਜਿਸ ਤੋਂ ਬਾਅਦ ਯਾਤਰਾ ਦੇ ਕਿਰਾਏ ਦੇ ਭੁਗਤਾਨ ਦੇ ਤਰੀਕੇ ਨੂੰ ਲੈ ਕੇ ਦੋਵਾਂ ਵਿਚਾਲੇ ਬਹਿਸ ਹੋ ਗਈ ਸੀ। ਇਸ ਤੋਂ ਬਾਅਦ ਮਾਰਗੋਲ ਨੇ ਸਿੰਘ ਦੀ ਬੇਰਹਿਮੀ ਨਾਲ ਕੁੱਟਮਾਰ ਕੀਤੀ ਸੀ।