- Updated: January 08, 2026 07:55 PM
ਉੱਤਰੀ ਅਟਲਾਂਟਿਕ ਮਹਾਸਾਗਰ ਵਿੱਚ ਇੱਕ ਵੱਡੀ ਫੌਜੀ ਕਾਰਵਾਈ ਦੌਰਾਨ ਅਮਰੀਕੀ ਤੱਟ ਰੱਖਿਅਕ ਬਲ (US Coast Guard) ਨੇ ਬ੍ਰਿਟਿਸ਼ ਹਥਿਆਰਬੰਦ ਬਲਾਂ ਦੇ ਸਹਿਯੋਗ ਨਾਲ ਰੂਸੀ ਝੰਡੇ ਵਾਲੇ ਤੇਲ ਟੈਂਕਰ 'ਬੇਲਾ 1' (Bella 1) ਨੂੰ ਰੋਕ ਲਿਆ ਹੈ। ਇਸ ਸਫਲ ਸਾਂਝੇ ਅਪ੍ਰੇਸ਼ਨ ਤੋਂ ਬਾਅਦ ਬ੍ਰਿਟੇਨ ਦੇ ਪ੍ਰਧਾਨ ਮੰਤਰੀ ਕੀਰ ਸਟਾਰਮਰ ਨੇ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨਾਲ ਫ਼ੋਨ 'ਤੇ ਗੱਲਬਾਤ ਕੀਤੀ ਅਤੇ ਅੰਤਰਰਾਸ਼ਟਰੀ ਸੁਰੱਖਿਆ ਮੁੱਦਿਆਂ 'ਤੇ ਚਰਚਾ ਕੀਤੀ।
ਬ੍ਰਿਟਿਸ਼ ਪ੍ਰਧਾਨ ਮੰਤਰੀ ਦੇ ਦਫ਼ਤਰ 'ਡਾਊਨਿੰਗ ਸਟ੍ਰੀਟ' ਵੱਲੋਂ ਜਾਰੀ ਬਿਆਨ ਅਨੁਸਾਰ, ਦੋਵਾਂ ਨੇਤਾਵਾਂ ਨੇ ਪਾਬੰਦੀਆਂ ਦੀ ਉਲੰਘਣਾ ਕਰਨ ਵਾਲਿਆਂ ਵਿਰੁੱਧ ਸਾਂਝੇ ਯਤਨਾਂ ਤਹਿਤ 'ਬੇਲਾ 1' ਨੂੰ ਰੋਕਣ ਦੀ ਕਾਰਵਾਈ, ਯੂਕਰੇਨ ਦੇ ਹਾਲੀਆ ਘਟਨਾਕ੍ਰਮ ਅਤੇ ਵੈਨੇਜ਼ੁਏਲਾ ਵਿੱਚ ਅਮਰੀਕੀ ਮੁਹਿੰਮ ਬਾਰੇ ਵਿਸਥਾਰ ਨਾਲ ਗੱਲਬਾਤ ਕੀਤੀ। ਰੱਖਿਆ ਮੰਤਰਾਲੇ ਨੇ ਦੱਸਿਆ ਕਿ ਅਮਰੀਕਾ ਦੀ ਬੇਨਤੀ 'ਤੇ ਬ੍ਰਿਟੇਨ ਨੇ ਆਪਣੇ ਰਾਇਲ ਏਅਰ ਫੋਰਸ ਦੇ ਟੋਹੀ ਜਹਾਜ਼ ਅਤੇ ਰਾਇਲ ਨੇਵੀ ਦੇ ਸਹਾਇਕ ਜਹਾਜ਼ 'ਆਰ.ਐੱਫ.ਏ. ਟਾਈਡਫੋਰਸ' ਨੂੰ ਇਸ ਮੁਹਿੰਮ ਵਿੱਚ ਤਾਇਨਾਤ ਕੀਤਾ ਸੀ।
ਜਾਣਕਾਰੀ ਮੁਤਾਬਕ, ਇਹ ਟੈਂਕਰ ਜਿਸ ਦਾ ਪਹਿਲਾ ਨਾਂ 'ਮੈਰੀਨੇਰਾ' ਸੀ, ਈਰਾਨ ਵਿਰੋਧੀ ਕਾਰਵਾਈ ਤਹਿਤ ਅਮਰੀਕੀ ਪਾਬੰਦੀਆਂ ਦੀ ਸੂਚੀ ਵਿੱਚ ਸ਼ਾਮਲ ਸੀ। ਇਹ ਪਾਇਆ ਗਿਆ ਕਿ ਇਹ ਜਹਾਜ਼ ਸਮੁੰਦਰ ਵਿੱਚ ਆਪਣੀ ਮੌਜੂਦਗੀ ਛੁਪਾਉਣ ਲਈ ਟ੍ਰਾਂਸਪੋਂਡਰ ਬੰਦ ਕਰਕੇ ਇੱਕ ਫਰਜ਼ੀ ਝੰਡਾ ਲਹਿਰਾ ਰਿਹਾ ਸੀ। ਬ੍ਰਿਟਿਸ਼ ਰੱਖਿਆ ਮੰਤਰੀ ਜੌਨ ਹੀਲੀ ਨੇ ਇਸ ਕਾਰਵਾਈ ਨੂੰ ਅੰਤਰਰਾਸ਼ਟਰੀ ਕਾਨੂੰਨਾਂ ਦੇ ਅਨੁਕੂਲ ਦੱਸਿਆ ਅਤੇ ਕਿਹਾ ਕਿ ਰੂਸ ਜਾ ਰਹੇ ਇਸ ਜਹਾਜ਼ ਨੂੰ ਰੋਕਣਾ ਪਾਬੰਦੀਆਂ ਨੂੰ ਸਖ਼ਤੀ ਨਾਲ ਲਾਗੂ ਕਰਨ ਦੇ ਵਿਸ਼ਵਵਿਆਪੀ ਯਤਨਾਂ ਦਾ ਹਿੱਸਾ ਹੈ। ਹੀਲੀ ਨੇ ਅੱਗੇ ਕਿਹਾ ਕਿ ਇਸ ਕਾਰਵਾਈ ਨੇ ਸਿੱਧ ਕਰ ਦਿੱਤਾ ਹੈ ਕਿ ਬ੍ਰਿਟੇਨ ਅਤੇ ਅਮਰੀਕਾ ਦੇ ਰੱਖਿਆ ਸਬੰਧ ਦੁਨੀਆ ਵਿੱਚ ਸਭ ਤੋਂ ਪ੍ਰਗਾੜ੍ਹ (ਮਜ਼ਬੂਤ) ਹਨ।