- Updated: January 22, 2025 07:28 PM
ਸ਼ੰਭੂ ਮੋਰਚੇ ’ਤੇ ਸਰਵਣ ਪੰਧੇਰ ਨੇ ਪ੍ਰੈਸ ਕਾਨਫ਼ਰੰਸ ਕੀਤੀ। ਕਾਨਫ਼ਰੰਸ ਦੌਰਾਨ ਪੰਧੇਰ ਨੇ ਮੋਰਚਿਆਂ ਦੇ ਸਬੰਧੀ ਰਣਨੀਤੀ ਬਾਰੇ ਗੱਲਬਾਤ ਕਰਦੇ ਹੋਏ ਕਿਹਾ ਕਿ ਦਿੱਲੀ ਅੰਦੋਲਨ -2 ਨੂੰ 20 ਦਿਨਾਂ ਬਾਅਦ ਲਗਭਗ ਇੱਕ ਸਾਲ ਪੂਰਾ ਕਰਨ ਜਾ ਰਿਹਾ ਹੈ। ਸਰਵਣ ਪੰਧੇਰ ਨੇ ਕਿਹਾ ਕਿ ਇਸ ਇੱਕ ਸਾਲ ’ਚ ਅਸੀਂ ਬਹੁਤ ਸਾਰੇ ਉਤਾਰ ਚੜਾਅ ਦੇਖੇ ਹਨ। ਉਨ੍ਹਾਂ ਕਿਹਾ ਕਿ ਇਸ ਵੇਲੇ ਅੰਦੋਲਨ ਸਾਡਾ ਬੁਲੰਦੀਆਂ ਨੂੰ ਛੂਹ ਰਿਹਾ ਹੈ। ਉਤਰ ਭਾਰਤ ਹੀ ਨਹੀਂ ਪੂਰੇ ਭਾਰਤ ’ਚ ਕਿਸਾਨਾਂ ਮਜ਼ਦੂਰਾਂ ਦੇ ਵਿਚ ਇਸ ਅੰਦੋਲਨ ਨੇ MSP ਲੀਗਲ ਗਾਰੰਟੀ ਦੀ ਗੱਲ ਚੁੱਲ੍ਹੇ –ਚੁੱਲ੍ਹੇ ਤੱਕ ਪਹੁੰਚਾਈ ਹੈ।
ਪੰਧੇਰ ਨੇ ਕਿਹਾ ਕਿ ਕਿਸਾਨ ਨੂੰ ਕਰਜ਼ ਮੁਕਤ ਕਰਨਾ ਇਸ ਮੰਗ ਨੂੰ ਵੱਡੇ ਪੱਧਰ ’ਤੇ ਉਭਾਰ ਆ ਰਿਹਾ ਹੈ। ਉਨ੍ਹਾਂ ਕਿਹਾ ਕੇਂਦਰ ਸਰਕਾਰ ਮਜ਼ਦੂਰਾਂ ਦੀ 200 ਦਿਨ ਚੰਗੀ ਮਨਰੇਗਾ ਦਿਹਾੜੀ, ਫ਼ਸਲੀ ਬੀਮਾ ਯੋਜਨਾ, ਸਰਕਾਰ ਆਪਣੇ ਦਮ ’ਤੇ ਕਰੇ ਨਾ ਕੇ ਕਾਰਪੋਰੇਟਿਵ ਘਰਾਣੇ ਕਰਨ, ਲਖੀਮਪੁਰ ਖੀਰੀ ਦਾ ਇਨਸਾਫ਼, ਸਾਰੇ ਜਿਹੜੇ ਵੀ ਕੇਸ ਪਾਏ ਗਏ ਹਨ ਵੀ ਵਾਪਸ ਲਏ ਜਾਣ। ਉਨ੍ਹਾਂ ਕਿਹਾ ਕਿ ਸ਼ਹੀਦ ਸੁਭਕਰਨ ਸਿੰਘ ਦੀ ਸ਼ਹੀਦੀ ਕਰਨ ਵਾਲਿਆਂ ਨੂੰ ਕਟਹਿਰੇ ’ਚ ਖੜਾ ਕੀਤਾ ਜਾਵੇ।ਆਦੀ ਵਾਸੀਆਂ ਦੇ ਸੰਵਿਧਾਨ ਦੀ ਪੰਜਵੀਂ ਸੂਚੀ ਇਹੋ ਜਿਹੀਆਂ 12 ਮੰਗਾਂ ਹੋਰ ਰੱਖੀਆਂ ਹਨ।
ਸਰਵਣ ਪੰਧੇਰ ਨੇ ਕਿਹਾ ਭਲਕੇ ਅੰਮ੍ਰਿਤਸਰ ਦੇ ਜੰਡਿਆਲਾ ਗੁਰੂ 10, 000 ਕਿਸਾਨ ਮਜ਼ਦੂਰ, ਮਾਵਾਂ ਭੈਣਾਂ, ਬੱਚੇ ਜੰਡਿਆਲਾ ਮੰਡੀ ’ਚ ਪਹੁੰਚਣਗੇ। ਜਿਥੇ ਵੱਡੀ ਰੈਲੀ ਹੋਵੇਗੀ। ਉਨ੍ਹਾਂ ਕਿਹਾ ਕਿ ਵੱਧ ਤੋਂ ਵੱਧ ਲੋਕ ਇਸ ਵਿਚ ਸ਼ਮੂਲੀਅਤ ਕਰਨ ਤਾਂ ਜੋ ਆਉਣ ਵਾਲੇ ਸਮੇਂ ਵਿਚ ਮੋਰਚੇ ਨੂੰ ਮਜ਼ਬੂਤ ਕਰ ਸਕੀਏ। ਪੰਧੇਰ ਨੇ ਕਿਹਾ ਕਿ ਇਸ ਵਾਰ ਰਤਨਪੁਰਾ ਮੋਰਚਾ, ਸ਼ੰਭੂ ਮੋਰਚਾ ਭਾਵੇਂ ਖਨੌਰੀ ਮੋਰਚਾ ਹੋਵੇ ਉਸ ਨੂੰ ਇਕੱਠੇ ਕਰਨ ਲਈ 29 ਜਨਵਰੀ ਨੂੰ ਬਿਆਸ ਵਿਚ ਇੱਕਠੇ ਹੋਣਗੇ। ਬਿਆਸ ਤੋਂ ਬਾਅਦ 30 ਜਨਵਰੀ ਨੂੰ ਉਸ ਨੇ ਸ਼ੰਭੂ ਬਾਰਡਰ ਨੂੰ ਚਾਲੇ ਪਾਉਣੇ ਹਨ, ਉਸ ਦੀਆਂ ਤਿਆਰੀਆਂ ਲਈ ਪੰਜਾਬ ਭਰ ’ਚ ਵੱਧ ਤੋਂ ਵੱਧ ਟਰੈਕਟਰ ਟਰਾਲੀਆਂ ਜਾਣੀਆਂ ਚਾਹੀਦੀਆਂ ਹਨ।
ਉਨ੍ਹਾਂ ਕਿਹਾ ਕਿ ਅਸੀਂ ਲੋਕਾਂ ਨੂੰ ਅਪੀਲ ਕਰਦੇ ਹਾਂ ਕਿ ਜਿਵੇਂ ਕੇਂਦਰ ਸਰਕਾਰ ਵਲੋਂ ਗੱਲਬਾਤ ਦਾ ਸੱਦਾ ਆਇਆ ਹੈ। ਹੁਣ ਸਰਕਾਰ ’ਤੇ ਦਬਾਅ ਪਾਉਣ ਦੀ ਲੋੜ ਹੈ। ਸਰਕਾਰ ਹਮੇਸਾਂ ਸਿਰਾਂ ਨੂੰ ਗਿਣਦੀਆਂ ਹਨ ਸੋ ਵੱਧ ਤੋਂ ਵੱਧ ਵੱਡੇ ਪੱਧਰ ’ਤੇ ਸ਼ਮੂਲਅਤ ਕੀਤੀ ਜਾਣੀ ਚਾਹੀਦੀ ਹੈ।
ਸਰਵਣ ਪੰਧੇਰ ਨੇ ਕਿਹਾ ਕਿ 24 ਜਨਵਰੀ ਨੂੰ ਟੋਲ ਪਲਾਜਾ ਕੱਥੂ ਅਬਦਾਲ ਪਿੰਡ ਅੰਮ੍ਰਿਤਸਰ ਵਿਖੇ ਵੱਡੀ ਮਹਾਂ ਪੰਚਾਇਤ ਕੀਤੀ ਜਾਵੇਗੀ। ਉਥੇ ਵੱਡੇ ਇੱਕਠ ਨਾਲ ਵੱਡੀ ਰੈਲੀ ਕੀਤੀ ਜਾਵੇਗੀ। 25 ਜਨਵਰੀ ਨੂੰ ਉਸੇ ਦਿਨ ਤੀਸਰੀ ਵੱਫੀ ਕਾਨਫ਼ਰੰਸ ਅੰਮ੍ਰਿਤਸਰ ਦਾ ਬਾਰਡਰ ਦਾ ਇਲਾਕਾ ਲਪੋਕੇ ਪਿੰਡ ਚਗਾਵਾਂ ਕਲਾ ਗੁਰਦੁਆਰਾ ਸਾਧੂ ਸਿੱਖ ਵਿਖੇ ਕਰਾਂਗੇ। ਉਥੇ ਬਹੁਤ ਵੱਡੇ ਪ੍ਰਬੰਧ ਕੀਤੇ ਗਏ ਹਨ। 25 ਜਨਵਰੀ ਨੂੰ ਅਜਨਾਲਾ ਦੇ ਪਿੰਡ ਚਮਿਆਰੀ ਮੰਡੀ ਵਿਚ ਕੀਤੀ ਜਾਵੇਗੀ ਵੱਡੀ ਰੈਲੀ ਹੋਵੇਗੀ। 26 ਜਨਵਰੀ ਨੂੰ ਦੋਨਾਂ ਫੋਰਮਾਂ ਵਲੋਂ ਦੇਸ਼ ਵਿਆਪੀ ਪ੍ਰੋਗਰਾਮ ਕੀਤੇ ਜਾਣਗੇ ਅਤੇ ਅੰਮ੍ਰਿਤਸਰ ਵਿਚ ਵੱਖ ਵੱਖ ਥਾਂਵਾਂ ’ਤੇ ਟਰੈਕਟਰ ਟਰਾਲੀਆਂ ਨਾਲ ਰੋਸ ਪ੍ਰਦਰਸ਼ਨ ਕੀਤੇ ਜਾਣਗੇ। ਫਿਰੋਜ਼ਪੁਰ ਵਿਚ ਦੋਵੇਂ ਟਿਕਾਣਿਆਂ ’ਤੇ ਟਰੈਕਟਰ ਜਾਣਗੇ।