- Updated: November 06, 2025 06:59 PM
ਪੰਜਾਬ ਦੇ ਮਾਲਵਾ ਖੇਤਰ ਦਾ ਦਹਾਕਿਆਂ ਪੁਰਾਣਾ ਸੁਪਨਾ ਹੁਣ ਪੂਰਾ ਹੋਣ ਦੀ ਦਹਿਲੀਜ਼ ‘ਤੇ ਹੈ। ਲੁਧਿਆਣਾ ਜ਼ਿਲ੍ਹੇ ਦੇ ਪਿੰਡ ਐਤੀਆਣਾ 'ਚ 162 ਏਕੜ ਵਿੱਚ ਫੈਲਿਆ ਹਲਵਾਰਾ ਇੰਟਰਨੈਸ਼ਨਲ ਏਅਰਪੋਰਟ ਹੁਣ ਉਡਾਣਾਂ ਲਈ ਤਿਆਰ ਹੈ ਅਤੇ ਕੇਵਲ ਨਾਗਰਿਕ ਹਵਾਈ ਸੁਰੱਖਿਆ ਏਜੰਸੀ (ਬੀ.ਸੀ.ਏ.ਐੱਸ) ਦੀ ਆਖਰੀ ਮਨਜ਼ੂਰੀ ਦਾ ਇੰਤਜ਼ਾਰ ਹੈ। ਇਸ ਦੇ ਨਾਲ ਹੀ ਜਲਦੀ ਹੀ ਇਸ ਏਅਰਪੋਰਟ ਦੇ ਉਦਘਾਟਨ ਦੀ ਤਾਰੀਖ਼ ਦਾ ਐਲਾਨ ਵੀ ਹੋ ਸਕਦਾ ਹੈ। ਜਦੋਂ ਇਹ ਏਅਰਪੋਰਟ ਚਾਲੂ ਹੋਵੇਗਾ, ਤਾਂ ਇਹ ਮਾਲਵਾ ਦੇ ਵਿਕਾਸ, ਰੋਜ਼ਗਾਰ ਅਤੇ ਵਪਾਰ ਲਈ ਨਵੇਂ ਦਰਵਾਜ਼ੇ ਖੋਲ੍ਹੇਗਾ।
ਹਲਵਾਰਾ ਹਵਾਈ ਅੱਡੇ ਦਾ ਸਿਵਲ ਟਰਮਿਨਲ ਪੂਰੀ ਤਰ੍ਹਾਂ ਤਿਆਰ ਹੋ ਚੁੱਕਾ ਹੈ। ਏਅਰ ਕੰਡੀਸ਼ਨਿੰਗ, ਲਾਈਟਿੰਗ, ਸੁਰੱਖਿਆ ਪ੍ਰਣਾਲੀ ਅਤੇ ਬੈਗੇਜ ਸਿਸਟਮ ਦੀ ਟੈਸਟਿੰਗ ਸਫਲਤਾਪੂਰਵਕ ਪੂਰੀ ਹੋ ਗਈ ਹੈ। ਟਰਮਿਨਲ ਦਾ ਡਿਜ਼ਾਇਨ ਅੰਤਰਰਾਸ਼ਟਰੀ ਮਿਆਰਾਂ ਦੇ ਅਨੁਸਾਰ ਕੀਤਾ ਗਿਆ ਹੈ, ਜਿਸ ਵਿੱਚ ਆਧੁਨਿਕ ਸਹੂਲਤਾਂ, ਵਿਸ਼ਾਲ ਯਾਤਰੀ ਹਾਲ, ਸੁਰੱਖਿਅਤ ਚੈਕ-ਇਨ ਪ੍ਰਣਾਲੀ ਅਤੇ ਯਾਤਰੀ ਸੁਵਿਧਾਵਾਂ ਉਪਲਬਧ ਹਨ। ਡਿਪਟੀ ਕਮਿਸ਼ਨਰ ਹਿਮਾਂਸ਼ੂ ਜੈਨ ਦੀ ਅਗਵਾਈ ਵਿਚ ਅਧਿਕਾਰੀਆਂ ਨੇ ਹਾਲ ਹੀ ਵਿਚ ਏਅਰਪੋਰਟ ਸਾਈਟ ਦਾ ਵਿਸਥਾਰਪੂਰਵਕ ਨਿਰੀਖਣ ਕੀਤਾ। ਉਨ੍ਹਾਂ ਕਿਹਾ ਕਿ ਸਾਰੇ ਤਕਨੀਕੀ ਕੰਮ ਸਮੇਂ ਸਿਰ ਪੂਰੇ ਹੋ ਗਏ ਹਨ ਅਤੇ ਹਵਾਈ ਅੱਡਾ ਕਿਸੇ ਵੀ ਵੇਲੇ ਉਦਘਾਟਨ ਲਈ ਤਿਆਰ ਹੈ।
ਹਲਵਾਰਾ ਏਅਰਪੋਰਟ ਨੂੰ ਖੋਲ੍ਹਣ ਨਾਲ ਲੁਧਿਆਣਾ, ਮੋਗਾ, ਬਰਨਾਲਾ, ਬਠਿੰਡਾ, ਮਲੇਰਕੋਟਲਾ, ਫ਼ਰੀਦਕੋਟ ਅਤੇ ਫਿਰੋਜ਼ਪੁਰ ਜ਼ਿਲ੍ਹਿਆਂ ਦੇ ਉਦਯੋਗਪਤੀਆਂ ਨੂੰ ਵੱਡਾ ਫ਼ਾਇਦਾ ਹੋਵੇਗਾ। ਲੁਧਿਆਣਾ ਦੇ ਉਦਯੋਗਿਕ ਇਲਾਕੇ ਨੂੰ ਸਿੱਧਾ ਏਅਰ ਕਾਰਗੋ ਕਨੈਕਸ਼ਨ ਮਿਲਣ ਨਾਲ ਨਿਰਯਾਤ ਅਤੇ ਵਪਾਰ ਦੇ ਰਸਤੇ ਖੁਲ੍ਹਣਗੇ। ਇਸ ਨਾਲ ਚੰਡੀਗੜ੍ਹ ਅਤੇ ਦਿੱਲੀ ਹਵਾਈ ਅੱਡਿਆਂ ‘ਤੇ ਨਿਰਭਰਤਾ ਘਟੇਗੀ।
ਹਵਾਈ ਅੱਡੇ ‘ਤੇ ਬੋਇੰਗ ਅਤੇ ਏਅਰਬਸ ਜਹਾਜ਼ਾਂ ਦੀ ਉਡਾਣ ਅਤੇ ਲੈਂਡਿੰਗ ਲਈ ਪੂਰੀ ਤਿਆਰੀ ਕੀਤੀ ਗਈ ਹੈ। ਰਨਵੇ ਦੀ ਲੰਬਾਈ ਅਤੇ ਟੈਕਸੀਵੇ ਨੂੰ ਅੰਤਰਰਾਸ਼ਟਰੀ ਮਿਆਰਾਂ ਦੇ ਅਨੁਸਾਰ ਅੱਪਗਰੇਡ ਕੀਤਾ ਗਿਆ ਹੈ। ਸਟੀਲ ਫੈਂਸਿੰਗ ਦੀ ਥਾਂ ਮਜ਼ਬੂਤ ਕੰਕਰੀਟ ਦੀ ਕੰਧ ਬਣਾਈ ਗਈ ਹੈ, ਜਿਸ ਨਾਲ ਸੁਰੱਖਿਆ ਹੋਰ ਮਜ਼ਬੂਤ ਹੋਈ ਹੈ।
ਸ਼ੁਰੂਆਤੀ ਪੜਾਅ ਵਿਚ ਏਅਰ ਇੰਡੀਆ ਅਤੇ ਵਿਸਤਾਰਾ ਵੱਲੋਂ ਦਿੱਲੀ-ਹਲਵਾਰਾ ਰੂਟ ‘ਤੇ ਉਡਾਣਾਂ ਚਲਾਉਣ ਲਈ ਸਹਿਮਤੀ ਦਿੱਤੀ ਗਈ ਹੈ। ਅਗਲੇ ਪੜਾਅ ਵਿਚ ਮੁੰਬਈ, ਬੈਂਗਲੁਰੂ ਅਤੇ ਹੈਦਰਾਬਾਦ ਨਾਲ ਸਿੱਧੀ ਕਨੈਕਸ਼ਨ ਦੀ ਯੋਜਨਾ ਹੈ। ਭਵਿੱਖ ਵਿਚ ਹਲਵਾਰਾ ਏਅਰਪੋਰਟ ਤੋਂ ਅੰਤਰਰਾਸ਼ਟਰੀ ਉਡਾਣਾਂ ਵੀ ਸ਼ੁਰੂ ਕਰਨ ਦੀ ਯੋਜਨਾ ਹੈ।
ਅੰਤਰਰਾਸ਼ਟਰੀ ਹਵਾਈ ਯਾਤਰਾ ਸੰਸਥਾ (ਆਈਏਟੀਏ) ਵੱਲੋਂ ਹਲਵਾਰਾ ਹਵਾਈ ਅੱਡੇ ਨੂੰ ਕੋਡ "ਐਚਡਬਲਯੂਆਰ" ਜਾਰੀ ਕਰ ਦਿੱਤਾ ਗਿਆ ਹੈ।
ਲੋਕ ਨਿਰਮਾਣ ਵਿਭਾਗ (ਪੀਡਬਲਯੂਡੀ) ਵੱਲੋਂ ਭਾਰਤੀ ਹਵਾਈ ਅੱਡਾ ਪ੍ਰਾਧੀਕਰਨ (ਏਏਆਈ) ਨੂੰ ਢਾਂਚਾ ਹਵਾਲੇ ਕਰਨ ਦੀ ਕਾਰਵਾਈ ਸ਼ੁਰੂ ਹੋ ਚੁੱਕੀ ਹੈ।
ਰਿਪੋਰਟਾਂ ਮੁਤਾਬਕ, 2025 ਦੇ ਅੰਤ ਤੱਕ ਸਾਰਾ ਢਾਂਚਾ ਪੂਰੀ ਤਰ੍ਹਾਂ (ਏਏਆਈ) ਦੇ ਹਵਾਲੇ ਕਰ ਦਿੱਤਾ ਜਾਵੇਗਾ।
ਹਲਵਾਰਾ ਹਵਾਈ ਅੱਡੇ ਦਾ ਉਦਘਾਟਨ ਪਹਿਲਾਂ ਜੁਲਾਈ 2025 ਵਿੱਚ ਕਰਨਾ ਨਿਰਧਾਰਿਤ ਸੀ, ਪਰ ਭਾਜਪਾ ਆਗੂਆਂ ਦੇ ਬਿਹਾਰ ਚੋਣਾਂ ਵਿਚ ਰੁਝੇਵਿਆਂ ਕਾਰਨ ਸਮਾਰੋਹ ਨੂੰ ਫਿਲਹਾਲ ਟਾਲ ਦਿੱਤਾ ਗਿਆ ਹੈ। ਹੁਣ ਚੋਣਾਂ ਤੋਂ ਬਾਅਦ ਹੀ ਨਵੀਂ ਤਾਰੀਖ਼ ਦਾ ਐਲਾਨ ਹੋਣ ਦੀ ਉਮੀਦ ਹੈ।
ਕੇਂਦਰੀ ਰਾਜ ਮੰਤਰੀ ਰਵਨੀਤ ਸਿੰਘ ਬਿੱਟੂ ਨੇ ਹਾਲ ਹੀ ਵਿਚ ਕਿਹਾ ਸੀ ਕਿ ਨਾਗਰਿਕ ਹਵਾਈ ਸੁਰੱਖਿਆ ਦਲ (ਬੀਸੀਏਐਸ) ਜਲਦੀ ਹੀ ਏਅਰਪੋਰਟ ਦਾ ਦੌਰਾ ਕਰੇਗਾ। ਉਨ੍ਹਾਂ ਨੇ ਕਿਹਾ ਕਿ ਸਾਰੀਆਂ ਵਿਧੀਆਂ ਪੂਰੀਆਂ ਹੋਣ ਤੋਂ ਬਾਅਦ ਹਲਵਾਰਾ ਤੋਂ ਪਹਿਲੀ ਉਡਾਣ ਨੂੰ ਹਰੀ ਝੰਡੀ ਮਿਲ ਜਾਵੇਗੀ।
ਹਲਵਾਰਾ ਏਅਰਪੋਰਟ ਦੇ ਮੁੱਖ ਬਿੰਦੂ
* 2 ਲੱਖ ਵਰਗ ਫੁੱਟ ਦਾ ਸਿਵਲ ਟਰਮਿਨਲ
* ਬੋਇੰਗ ਤੇ ਏਅਰਬਸ ਜਹਾਜ਼ਾਂ ਦੀ ਲੈਂਡਿੰਗ ਸਮਰੱਥਾ
* ਮਜ਼ਬੂਤ ਕੰਕਰੀਟ ਸੁਰੱਖਿਆ ਕੰਧ
* ਟੈਕਸੀਵੇ ਤੇ ਐਪਰਨ ਦਾ ਕੰਮ ਮੁਕੰਮਲ
* ਦਿੱਲੀ-ਹਲਵਾਰਾ ਰੂਟ ‘ਤੇ ਪਹਿਲੀ ਉਡਾਣਾਂ ਦੀ ਯੋਜਨਾ
* ਘਰੇਲੂ ਉਡਾਣਾਂ ਤੋਂ ਬਾਅਦ ਅੰਤਰਰਾਸ਼ਟਰੀ ਜੋੜ
ਮਾਲਵਾ ਖੇਤਰ ਨੂੰ ਮਿਲਣਗੇ ਵੱਡੇ ਫਾਇਦੇ
* ਉਦਯੋਗਾਂ ਲਈ ਸਿੱਧਾ ਏਅਰ ਕਾਰਗੋ ਕਨੈਕਸ਼ਨ
* ਹਜ਼ਾਰਾਂ ਨਵੀਆਂ ਨੌਕਰੀਆਂ ਦੇ ਮੌਕੇ
* ਚੰਡੀਗੜ੍ਹ ਤੇ ਦਿੱਲੀ ਦੀ ਭੀੜ ਤੋਂ ਰਾਹਤ
* ਵਪਾਰ ਤੇ ਪਰਟਨ ਖੇਤਰ ਨੂੰ ਨਵੀਂ ਗਤੀ
* ਮਾਲਵਾ ਦੇ 10 ਜ਼ਿਲ੍ਹਿਆਂ ਨੂੰ ਹਵਾਈ ਯਾਤਰਾ ਦੀ ਸਹੂਲਤ
ਉਦਯੋਗਪਤੀਆਂ ਨੇ ਖੁਸ਼ੀ ਜ਼ਾਹਿਰ ਕਰਦਿਆਂ ਕਿਹਾ ਕਿ ਮਾਲਵਾ ਖੇਤਰ ਦਾ 50 ਸਾਲਾਂ ਪੁਰਾਣਾ ਸੁਪਨਾ ਹੁਣ ਸਾਕਾਰ ਹੋਣ ਜਾ ਰਿਹਾ ਹੈ। ਹਲਵਾਰਾ ਇੰਟਰਨੈਸ਼ਨਲ ਏਅਰਪੋਰਟ ਨਾ ਸਿਰਫ਼ ਪੰਜਾਬ ਦੇ ਹਵਾਈ ਨਕਸ਼ੇ ‘ਤੇ ਨਵਾਂ ਅਧਿਆਇ ਲਿਖੇਗਾ, ਸਗੋਂ ਪੂਰੇ ਖੇਤਰ ਦੀ ਆਰਥਿਕਤਾ ਅਤੇ ਰੋਜ਼ਗਾਰ ਦੇ ਮੌਕਿਆਂ ਵਿੱਚ ਵੀ ਕ੍ਰਾਂਤੀ ਲਿਆਏਗਾ।