- Updated: June 13, 2023 07:36 PM
ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਸਾਲ 2047 ਲਈ ਸੂਬਾ ਸਰਕਾਰ ਦਾ ‘ਵਿਜ਼ਨ ਡਾਕੂਮੈਂਟ’ ਜਾਰੀ ਕੀਤਾ ਤੇ ਇਸ ਦਸਤਾਵੇਜ਼ ਨੂੰ ਪ੍ਰਗਤੀਸ਼ੀਲ ਤੇ ਖੁਸ਼ਹਾਲ ਪੰਜਾਬ ਦਾ ਖਾਕਾ ਦੱਸਿਆ। ਆਪਣੇ ਦਫਤਰ ਵਿਚ ਇਕ ਆਸਾਨ ਪਰ ਪ੍ਰਭਾਵੀ ਸਮਾਰੋਹ ਦੌਰਾਨ ਦਸਤਾਵੇਜ਼ ਜਾਰੀ ਕਰਦੇ ਹੋਏ ਮੁੱਖ ਮੰਤਰੀ ਨੇ ਸੂਬੇ ਦੀ ਆਰਥਿਕਤਾ ਤੇ ਵਿੱਤੀ ਸਿਹਤ ਨੂੰ ਮੁੜ ਸੁਰਜੀਤ ਕਰਨ ਦੀ ਫੌਰੀ ਲੋੜ ‘ਤੇ ਜ਼ੋਰ ਦਿੱਤਾ।
ਉਨ੍ਹਾਂ ਕਿਹਾ ਕਿ ਇਹ ਦਸਤਾਵੇਜ਼ ਭਾਰਤ ਦੀ ਆਜ਼ਾਦੀ ਦੇ 100 ਸਾਲ ਪੂਰੇ ਹੋਣ ‘ਤੇ ਸੂਬੇ ਦੇ ਚਹੁਪੱਖੀ ਵਿਕਾਸ ਦੀ ਉਮੀਦ ਨੂੰ ਬੰਨ੍ਹਦਾ ਹੈ। ਉਨ੍ਹਾਂ ਕਿਹਾ ਕਿ ਇਸ ਦਸਤਾਵੇਜ਼ ਵਿਚ 9 ਵਿਭਾਗੀ ਖੰਡ ਤੇ 16 ਸਮਾਜਿਕ-ਆਰਥਿਕ ਆਧਾਰਿਤ ਉਪ ਖੰਡ ਸ਼ਾਮਲ ਹਨ ਜਿਨ੍ਹਾਂ ਵਿਚ ਮੌਜੂਦਾ ਸਥਿਤੀ, ਸੂਬੇ ਦੇ ਸਾਹਮਣੇ ਮੁੱਖ ਚੁਣੌਤੀਆਂ ਤੇ ਇਹਨਾਂ ਚੁਣੌਤੀਆਂ ਨਾਲ ਨਜਿੱਠਣ ਲਈ ਥੋੜ੍ਹੇ ਸਮੇਂ ਦੀਆਂ ਅਤੇ ਲੰਬੀ ਮਿਆਦ ਦੀਆਂ ਰਣਨੀਤੀਆਂ ਦੀ ਰੂਪਰੇਖਾ ਤਿਆਰ ਕੀਤੀ ਗਈ ਹੈ। ਭਗਵੰਤ ਮਾਨ ਨੇ ਕਿਹਾ ਕਿ ਦਸਤਾਵੇਜ਼ਾਂ ਅਨੁਸਾਰ ਆਰਥਿਕ ਵਿਕਾਸ ਦਰ 2030 ਤੱਕ 7.5 ਫੀਸਦੀ ਅਤੇ 2047 ਤੱਕ 10 ਫੀਸਦੀ ਰਹੇਗੀ।
ਮੁੱਖ ਮੰਤਰੀ ਨੇ ਕਿਹਾ ਕਿ ਦਸਤਾਵੇਜ਼ ਦਾ ਉਦੇਸ਼ ਸੂਬੇ ਵਿਚ ਨਿਵੇਸ਼ ਦੇ ਮਾਹੌਲ ਵਿਚ ਸੁਧਾਰ ਕਰਕੇ 2030 ਤੱਕ ਜੀਐੱਸਡੀਪੀ ਅਨੁਪਾਤ ਵਿਚ ਨਿਵੇਸ਼ ਨੂੰ 25 ਫੀਸਦੀ ਤੱਕ ਲਿਆਉਣਾ ਹੈ ਤੇ ਉਦਯੋਗਿਕ ਯੋਜਨਾਵਾਂ ਦੀ ਸਮੇਂ ਤੇ ਪ੍ਰੇਸ਼ਾਨੀ ਮੁਕਤ ਮਨਜ਼ੂਰੀ ਲਈ ਆਰਥਿਕ ਪ੍ਰਸ਼ਾਸਨਿਕ ਸੁਧਾਰ ਸ਼ੁਰੂਆਤ ਜ਼ਰੀਏ 2047 ਤੱਕ ਜੀਐੱਸਡੀਪੀ ਅਨੁਪਾਤ ਵਿਚ ਨਿਵੇਸ਼ ਨੂੰ 32 ਫੀਸਦੀ ਕਰਨਾ ਹੈ। ਉਨ੍ਹਾਂ ਕਿਹਾ ਕਿ ਸੂਚਨਾ ਉਦਯੋਗਿਕ, ਆਧਾਰਿਤ ਸੇਵਾਵਾਂ ਸਣੇ ਸੇਵਾ ਖੇਤਰ/ਬੀਪੀਓ, ਆਨਲਾਈਨ ਸਿੱਖਿਆ, ਸੋਸ਼ਲ ਮੀਡੀਆ ਤੇ ਮਨੋਰੰਜਨ ਵਰਗੀਆਂ ਤੇਜ਼ ਗਤੀ ਵਾਲੀਆਂ ਸੇਵਾਵਾਂ ਦਾ ਵਿਕਾਸ ਕੀਤਾ ਜਾਵੇਗਾ ਤੇ ਸੇਵਾ ਖੇਤਰ ਵਿਚ ਡਿਜੀਟਲ ਉਦਯੋਗਿਕ ਦੇ ਇਸਤੇਮਾਲ ਨੂੰ ਵੀ ਉਤਸ਼ਾਹਿਤ ਕੀਤਾ ਜਾਵੇਗਾ।