- Updated: June 20, 2023 12:17 AM
ਸੰਯੁਕਤ ਅਰਬ ਅਮੀਰਾਤ (ਯੂ.ਏ.ਈ.) ਅਤੇ ਕਤਰ ਨੇ ਇੱਕ ਦੂਜੇ ਵਿੱਚ ਆਪਣੇ ਦੂਤਘਰ ਮੁੜ ਖੋਲ੍ਹਣ ਦਾ ਐਲਾਨ ਕੀਤਾ ਹੈ। ਕਤਰ ਵੱਲੋਂ ਇਸਲਾਮਿਕ ਸਮੂਹਾਂ ਦੀ ਹਮਾਇਤ ਨੂੰ ਲੈ ਕੇ ਦੋਵਾਂ ਦੇਸ਼ਾਂ ਦੇ ਸਬੰਧ ਕਈ ਸਾਲਾਂ ਤੋਂ ਤਣਾਅਪੂਰਨ ਸਨ। ਦੋਵਾਂ ਦੇਸ਼ਾਂ ਨੇ ਸੋਮਵਾਰ ਨੂੰ ਬਿਆਨ ਜਾਰੀ ਕਰਕੇ ਕਿਹਾ ਕਿ ਅਬੂ ਧਾਬੀ ਵਿੱਚ ਕਤਰ ਦਾ ਦੂਤਘਰ, ਜਦਕਿ ਦੁਬਈ ਵਿੱਚ ਕਤਰ ਦੇ ਵਣਜ ਦੂਤਘਰ ਦੇ ਇਲਾਵਾ ਦੋਹਾ ਵਿੱਚ ਯੂ.ਏ.ਈ. ਦੇ ਦੂਤਘਰ ਨੇ ਕੰਮ ਕਰਨਾ ਸ਼ੁਰੂ ਕਰ ਦਿੱਤਾ ਹੈ। ਬਿਆਨ ਵਿੱਚ ਇਹ ਨਹੀਂ ਦੱਸਿਆ ਗਿਆ ਕਿ ਇਨ੍ਹਾਂ ਦੂਤਘਰਾਂ ਵਿੱਚ ਰਾਜਦੂਤ ਹਨ ਜਾਂ ਨਹੀਂ।
ਕਤਰ ਨੇ ਕਿਹਾ ਕਿ ਦੋਵਾਂ ਦੇਸ਼ਾਂ ਦੇ ਵਿਦੇਸ਼ ਮੰਤਰੀਆਂ ਨੇ ਡਿਪਲੋਮੈਟਿਕ ਮਿਸ਼ਨਾਂ ਨੂੰ ਮੁੜ ਖੋਲ੍ਹਣ 'ਤੇ ਇਕ ਦੂਜੇ ਨੂੰ ਵਧਾਈ ਦੇਣ ਲਈ ਫੋਨ 'ਤੇ ਗੱਲ ਕੀਤੀ। ਸੰਯੁਕਤ ਅਰਬ ਅਮੀਰਾਤ, ਸਾਊਦੀ ਅਰਬ, ਬਹਿਰੀਨ ਅਤੇ ਮਿਸਰ ਨੇ 2017 ਵਿੱਚ ਮੱਧ ਪੂਰਬ ਵਿੱਚ ਇਸਲਾਮੀ ਸਮੂਹਾਂ ਨੂੰ ਸਮਰਥਨ ਦੇਣ ਲਈ ਕਤਰ ਦੇ ਬਾਈਕਾਟ ਅਤੇ ਆਰਥਿਕ ਨਾਕਾਬੰਦੀ ਦਾ ਐਲਾਨ ਕੀਤਾ ਸੀ। ਆਮ ਤੌਰ 'ਤੇ ਦੋਸਤਾਨਾ ਖਾੜੀ ਅਰਬ ਦੇਸ਼ਾਂ ਵਿਚਕਾਰ ਬੇਮਿਸਾਲ ਕੂਟਨੀਤਕ ਸੰਕਟ ਨੇ ਸ਼ੁਰੂ ਵਿਚ ਹਥਿਆਰਬੰਦ ਸੰਘਰਸ਼ ਦਾ ਡਰ ਪੈਦਾ ਕੀਤਾ ਸੀ, ਪਰ ਕਤਰ ਦੀ ਗੈਸ ਦੌਲਤ ਅਤੇ ਤੁਰਕੀ ਅਤੇ ਈਰਾਨ ਨਾਲ ਨਜ਼ਦੀਕੀ ਸਬੰਧਾਂ ਨੇ ਇਸ ਨੂੰ ਆਰਥਿਕ ਪਾਬੰਦੀਆਂ ਤੋਂ ਕਾਫੀ ਹੱਦ ਤੱਕ ਬਚਾ ਲਿਆ ਸੀ। ਕਤਰ ਦਾ ਇਹ ਬਾਈਕਾਟ ਅਧਿਕਾਰਤ ਤੌਰ 'ਤੇ ਜਨਵਰੀ 2021 ਵਿੱਚ ਹਟਾ ਲਿਆ ਗਿਆ ਸੀ।