- Updated: September 01, 2023 05:29 PM
ਕੈਨੇਡਾ ਵਿਖੇ ਟੋਰਾਂਟੋ ਸ਼ਹਿਰ ਅਤੇ ਇਸ ਦੇ ਆਸਪਾਸ ਦੇ ਇਲਾਕੇ 'ਚ ਮਧੂਮੱਖੀਆਂ ਨੇ ਦਹਿਸ਼ਤ ਦਾ ਮਾਹੌਲ ਪੈਦਾ ਕਰ ਦਿੱਤਾ ਹੈ। ਇਹ ਮਧੂਮੱਖੀਆਂ ਦਾ ਕੋਈ ਛੋਟਾ ਝੁੰਡ ਨਹੀਂ, ਸਗੋਂ 50 ਲੱਖ ਮਧੂਮੱਖੀਆਂ ਦਾ ਝੁੰਡ ਹੈ। ਸਥਿਤੀ ਬੇਕਾਬੂ ਹੋਣ 'ਤੇ ਪੁਲਸ ਨੂੰ ਐਮਰਜੈਂਸੀ ਦਾ ਐਲਾਨ ਕਰਨਾ ਪਿਆ। ਦਰਅਸਲ ਇੰਨੀ ਵੱਡੀ ਗਿਣਤੀ 'ਚ ਸੜਕਾਂ 'ਤੇ ਮਧੂਮੱਖੀਆਂ ਦੇ ਆਉਣ ਦਾ ਕਾਰਨ ਇਕ ਟਰੱਕ ਦੱਸਿਆ ਜਾ ਰਿਹਾ ਹੈ। ਟਰੱਕ ਵਿੱਚ ਰੱਖੇ ਮਧੂਮੱਖੀਆਂ ਨਾਲ ਭਰੇ ਕਈ ਬਕਸੇ ਸੜਕ ’ਤੇ ਡਿੱਗ ਕੇ ਖੁੱਲ ਗਏ ਸਨ। ਪੁਲਸ ਨੇ ਲੋਕਾਂ ਨੂੰ ਇਨ੍ਹਾਂ ਤੋਂ ਬਚਣ ਲਈ ਵਾਹਨਾਂ ਅਤੇ ਘਰਾਂ ਦੇ ਸ਼ੀਸ਼ੇ ਬੰਦ ਰੱਖਣ ਲਈ ਕਿਹਾ ਹੈ।
ਏਪੀ ਦੀ ਰਿਪੋਰਟ ਮੁਤਾਬਕ ਇਹ ਹਾਦਸਾ ਉਸ ਸਮੇਂ ਵਾਪਰਿਆ, ਜਦੋਂ ਮਧੂਮੱਖੀਆਂ ਨੂੰ ਉਨ੍ਹਾਂ ਦੇ ਸਰਦੀਆਂ ਦੇ ਘਰ ਲਿਜਾਇਆ ਜਾ ਰਿਹਾ ਸੀ। ਹਾਲਟਨ ਖੇਤਰੀ ਪੁਲਸ ਅਧਿਕਾਰੀਆਂ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਸਵੇਰੇ 6:15 ਵਜੇ ਦੇ ਕਰੀਬ ਇੱਕ ਕਾਲ ਮਿਲੀ ਕਿ ਓਂਟਾਰੀਓ ਦੇ ਬਰਲਿੰਗਟਨ ਵਿੱਚ ਡੰਡਾਸ ਸਟਰੀਟ ਦੇ ਉੱਤਰ ਵਿੱਚ ਗੁਏਲਫ ਲਾਈਨ 'ਤੇ ਇੱਕ ਟਰੱਕ ਤੋਂ ਮੱਧੂਮੱਖੀਆਂ ਦੇ ਕਈ ਬਕਸੇ ਡਿੱਗ ਗਏ ਹਨ। ਪੁਲਸ ਨੇ ਦੱਸਿਆ ਕਿ ਬਕਸੇ ਸੱਚਮੁੱਚ ਸੜਕ 'ਤੇ ਸਨ ਅਤੇ ਮਧੂਮੱਖੀਆਂ ਦੇ ਝੁੰਡ ਚਾਰੇ ਪਾਸੇ ਉੱਡ ਰਹੇ ਸਨ। ਮਧੂਮੱਖੀ ਪਾਲਕ ਮੌਕੇ 'ਤੇ ਸੀ, ਉਸ ਨੂੰ ਮਧੂਮੱਖੀਆਂ ਨੇ ਕਈ ਵਾਰ ਡੰਗਿਆ ਸੀ। ਜਿਉਂ ਹੀ ਮਧੂਮੱਖੀਆਂ ਖਿੱਲਰਣ ਲੱਗੀਆਂ, ਪੁਲਸ ਨੇ ਪੈਦਲ ਚੱਲਣ ਵਾਲਿਆਂ ਨੂੰ ਇਲਾਕੇ ਤੋਂ ਦੂਰ ਰਹਿਣ ਦੀ ਚੇਤਾਵਨੀ ਦਿੱਤੀ, ਇਲਾਕਾ ਨਿਵਾਸੀਆਂ ਅਤੇ ਲੰਘਣ ਵਾਲੇ ਵਾਹਨ ਚਾਲਕਾਂ ਨੂੰ ਆਪਣੀਆਂ ਖਿੜਕੀਆਂ ਬੰਦ ਰੱਖਣ ਦੀ ਅਪੀਲ ਕੀਤੀ।
ਪੁਲਸ ਨੇ ਇਸ ਘਟਨਾ ਸਬੰਧੀ ਸੋਸ਼ਲ ਮੀਡੀਆ 'ਤੇ ਪੋਸਟ ਵੀ ਪਾਈ, ਜਿਸ ਤੋਂ ਬਾਅਦ ਕਈ ਮਧੂਮੱਖੀ ਪਾਲਕਾਂ ਨੇ ਪੁਲਸ ਨਾਲ ਸੰਪਰਕ ਕੀਤਾ ਅਤੇ ਉਨ੍ਹਾਂ ਨੂੰ ਮਦਦ ਦੀ ਪੇਸ਼ਕਸ਼ ਕੀਤੀ। ਘਟਨਾ ਤੋਂ ਤੁਰੰਤ ਬਾਅਦ ਛੇ-ਸੱਤ ਮਧੂਮੱਖੀਆਂ ਪਾਲਣ ਵਾਲੇ ਮੌਕੇ 'ਤੇ ਪਹੁੰਚ ਗਏ। ਮਧੂਮੱਖੀ ਪਾਲਕ ਮਾਈਕਲ ਬਾਰਬਰ ਨੇ ਬੀਬੀਸੀ ਨੂੰ ਦੱਸਿਆ ਕਿ "ਇੱਥੇ ਬਹੁਤ ਸਾਰੀਆਂ ਉੱਡਣ ਵਾਲੀਆਂ ਮਧੂਮੱਖੀਆਂ ਸਨ ਕਿ ਪੂਰੇ ਸੂਟ ਵਿੱਚ ਮਧੂਮੱਖੀਆਂ ਪਾਲਣ ਵਾਲੇ ਵੀ ਘਬਰਾ ਗਏ।" ਉਸਨੇ ਦੱਸਿਆ ਕਿ “ਕੁਝ ਮਧੂਮੱਖੀ ਪਾਲਕਾਂ ਨੂੰ ਵੀ ਡੰਗਿਆ ਗਿਆ,”। ਰਿਪੋਰਟ ਮੁਤਾਬਕ 3 ਘੰਟਿਆਂ ਦੇ ਅੰਦਰ ਲਗਭਗ 50 ਲੱਖ ਮਧੂਮੱਖੀਆਂ 'ਚੋਂ ਜ਼ਿਆਦਾਤਰ ਨੂੰ ਸੁਰੱਖਿਅਤ ਫੜ ਲਿਆ ਗਿਆ। ਫਿਲਹਾਲ ਉਨ੍ਹਾਂ ਨੂੰ ਫੜਨ ਦਾ ਕੰਮ ਜਾਰੀ ਹੈ।