- Updated: November 09, 2026 03:37 PM
ਕੈਨੇਡਾ ਤੋਂ ਇਕ ਵੱਡੀ ਖ਼ਬਰ ਸਾਹਮਣੇ ਆਈ ਹੈ, ਜਿੱਥੇ ਪੀਲ ਰੀਜਨਲ ਪੁਲਸ ਦੀ 'ਸੇਫ਼ਰ ਰੋਡਜ਼ ਟੀਮ' ਨੇ ਮਿਸਿਸਾਗਾ ਅਤੇ ਟੋਰਾਂਟੋ 'ਚ ਗੈਰ-ਕਾਨੂੰਨੀ ਸਟ੍ਰੀਟ ਰੇਸਿੰਗ ਅਤੇ ਖ਼ਤਰਨਾਕ ਡਰਾਈਵਿੰਗ ਕਰਨ ਦੇ ਦੋਸ਼ ਹੇਠ ਬ੍ਰੈਂਪਟਨ ਦੇ 24 ਸਾਲਾ ਪੰਜਾਬੀ ਨੌਜਵਾਨ ਤਰਮਨ ਤੂਰ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਪੁਲਸ ਵੱਲੋਂ ਇਹ ਕਾਰਵਾਈ ਲਗਭਗ 3 ਮਹੀਨੇ ਚੱਲੀ ਡੂੰਘੀ ਜਾਂਚ ਤੋਂ ਬਾਅਦ ਅਮਲ ਵਿੱਚ ਲਿਆਂਦੀ ਗਈ ਹੈ।
ਪੁਲਸ ਤੋਂ ਮਿਲੀ ਜਾਣਕਾਰੀ ਮੁਤਾਬਕ, ਮੁਲਜ਼ਮ ਨੌਜਵਾਨ ਆਪਣੀ ਲਾਲ ਰੰਗ ਦੀ BMW M3 ਕਾਰ ਬਿਨਾਂ ਨੰਬਰ ਪਲੇਟਾਂ ਤੋਂ ਚਲਾ ਰਿਹਾ ਸੀ ਅਤੇ ਆਪਣੀ ਪਛਾਣ ਛੁਪਾਉਣ ਲਈ ਮਾਸਕ ਪਾ ਕੇ ਗੈਰ-ਕਾਨੂੰਨੀ ਰੇਸਾਂ ਲਗਾਉਂਦਾ ਸੀ। ਉਸ ਨੂੰ 30 ਅਗਸਤ ਦੀ ਰਾਤ ਨੂੰ ਮਿਸਿਸਾਗਾ ਦੇ ਐਕਸਪਲੋਰਰ ਡਰਾਈਵ ਅਤੇ ਸੈਟੇਲਾਈਟ ਡਰਾਈਵ ਖੇਤਰ 'ਚ ਰੇਸਿੰਗ ਕਰਦੇ ਦੇਖਿਆ ਗਿਆ। ਇਸ ਤੋਂ ਇਲਾਵਾ ਉਸ ਨੇ ਮੈਡੋਪਾਈਨ ਬੁਲੇਵਾਰਡ ਅਤੇ ਡੈਨਬਰੋ ਕ੍ਰਿਸੈਂਟ ਵਿਖੇ ਵੀ ਰੇਸਿੰਗ ਕੀਤੀ, ਜਿੱਥੇ ਉਸ ਨੇ ਵਿੰਸਟਨ ਚਰਚਿਲ ਬੁਲੇਵਾਰਡ ਅਤੇ ਹਾਈਵੇਅ 401 'ਤੇ ਰੈੱਡ ਲਾਈਟ ਵੀ ਜੰਪ ਕੀਤੀ। ਇਸ ਤੋਂ ਬਾਅਦ ਉਸ ਨੂੰ ਟੋਰਾਂਟੋ ਦੇ ਕਲੇਸਨ ਰੋਡ ਅਤੇ ਬਾਰਟਰ ਰੋਡ 'ਚ ਵੀ ਰੇਸਿੰਗ ਕਰਦਿਆਂ ਦੇਖਿਆ ਗਿਆ।
28 ਅਕਤੂਬਰ ਨੂੰ ਪੁਲਸ ਨੇ ਤੂਰ ਦੀ ਬ੍ਰੈਂਪਟਨ ਸਥਿਤ ਰਿਹਾਇਸ਼ 'ਤੇ ਸਰਚ ਵਾਰੰਟ ਨਾਲ ਛਾਪਾ ਮਾਰ ਕੇ ਉਸ ਨੂੰ ਗ੍ਰਿਫ਼ਤਾਰ ਕਰ ਲਿਆ। ਉਸ ਖ਼ਿਲਾਫ਼ ਖ਼ਤਰਨਾਕ ਡਰਾਈਵਿੰਗ, ਪਛਾਣ ਛੁਪਾਉਣਾ ਤੇ ਗੈਰ-ਕਾਨੂੰਨੀ ਮੋਟਰ ਰੇਸਿੰਗ ਦੇ ਦੋਸ਼ ਆਇਦ ਕੀਤੇ ਗਏ ਹਨ। ਤੂਰ ਨੂੰ ਬ੍ਰੈਂਪਟਨ ਦੀ ਓਂਟਾਰੀਓ ਕੋਰਟ ਆਫ਼ ਜਸਟਿਸ ਵਿੱਚ ਪੇਸ਼ ਕੀਤਾ ਜਾਵੇਗਾ। ਇਸ ਮਾਮਲੇ ਮਗਰੋਂ ਪੁਲਸ ਨੇ ਆਮ ਜਨਤਾ ਨੂੰ ਖ਼ਤਰਨਾਕ ਡਰਾਈਵਿੰਗ ਦੀਆਂ ਘਟਨਾਵਾਂ ਦੀ ਰਿਪੋਰਟ 'ਰੋਡ ਵਾਚ' ਪੋਰਟਲ 'ਤੇ ਦੇਣ ਦੀ ਅਪੀਲ ਕੀਤੀ ਹੈ।