- Updated: August 08, 2023 02:46 PM
ਦਿੱਲੀ ਦੀ ਮੰਤਰੀ ਆਤਿਸ਼ੀ ਨੂੰ ਸੇਵਾਵਾਂ ਅਤੇ ਚੌਕਸੀ ਵਿਭਾਗਾਂ ਦਾ ਐਡੀਸ਼ਨਲ ਚਾਰਜ ਸੌਂਪਿਆ ਜਾਵੇਗਾ ਅਤੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਨੇ ਇਸ ਨਾਲ ਸੰਬੰਧਤ ਪ੍ਰਸਤਾਵ ਮਨਜ਼ੂਰੀ ਲਈ ਉੱਪ ਰਾਜਪਾਲ ਵੀ.ਕੇ. ਸਕਸੈਨਾ ਨੂੰ ਭੇਜਿਆ ਹੈ। ਇਕ ਸਰਕਾਰੀ ਸੂਤਰ ਨੇ ਇਹ ਜਾਣਕਾਰੀ ਦਿੱਤੀ। ਇਹ ਦੋਵੇਂ ਵਿਭਾਗ ਪਹਿਲਾਂ ਆਤਿਸ਼ੀ ਦੇ ਕੈਬਨਿਟ ਸਹਿਯੋਗੀ ਸੌਰਭ ਭਾਰਦਵਾਜ ਕੋਲ ਸਨ। ਇਹ ਕਦਮ ਦਿੱਲੀ ਸੇਵਾ ਬਿੱਲ ਨੂੰ ਸੰਸਦੀ ਮਨਜ਼ੂਰੀ ਮਿਲਣ ਦੇ ਇਕ ਦਿਨ ਬਾਅਦ ਆਇਆ ਹੈ। ਇਹ ਬਿੱਲ ਕੇਂਦਰ ਨੂੰ ਰਾਸ਼ਟਰੀ ਰਾਜਧਾਨੀ 'ਚ ਨੌਕਰਸ਼ਾਹੀ 'ਤੇ ਕੰਟਰੋਲ ਦੇਵੇਗਾ।
ਸੰਸਦ ਨੇ ਸੋਮਵਾਰ ਨੂੰ ਵਿਵਾਦਿਤ 'ਦਿੱਲੀ ਰਾਸ਼ਟਰੀ ਰਾਜਧਾਨੀ ਖੇਤਰ ਸ਼ਾਸਨ ਸੋਧ ਬਿੱਲ 2023' ਨੂੰ ਵੋਟ ਵੰਡ ਤੋਂ ਬਾਅਦ ਮਨਜ਼ੂਰੀ ਦੇ ਦਿੱਤੀ। ਇਹ ਬਿੱਲ ਦਿੱਲੀ 'ਚ ਸਮੂਹ-ਏ ਦੇ ਅਧਿਕਾਰੀਆਂ ਦੇ ਟਰਾਂਸਫਰ ਅਤੇ ਪੋਸਟਿੰਗ ਲਈ ਇਕ ਅਥਾਰਟੀ ਦੇ ਗਠਨ ਦੇ ਲਿਹਾਜ ਨਾਲ ਲਾਗੂ ਆਰਡੀਨੈਂਸ ਦਾ ਸਥਾਨ ਲਵੇਗਾ। ਉੱਪ ਰਾਜਪਾਲ ਵੀ.ਕੇ. ਸਕਸੈਨਾ ਵਲੋਂ ਕੈਬਨਿਟ 'ਚ ਫੇਰਬਦਲ ਦੇ ਪ੍ਰਸਤਾਵ ਨੂੰ ਜੂਨ 'ਚ ਮਨਜ਼ੂਰੀ ਦਿੱਤੇ ਜਾਣ ਤੋਂ ਬਾਅਦ ਆਤਿਸ਼ੀ ਨੂੰ ਮਾਲੀਆ ਅਤੇ ਯੋਜਨਾ ਅਤੇ ਵਿੱਤ ਵਿਭਾਗਾਂ ਦਾ ਐਡੀਸ਼ਨਲ ਚਾਰਜ ਦਿੱਤਾ ਗਿਆ ਸੀ। ਇਹ ਤਿੰਨ ਵਿਭਾਗ ਪਹਿਲੇ ਟਰਾਂਸਪੋਰਟ ਮੰਤਰੀ ਕੈਲਾਸ਼ ਗਹਿਲੋਤ ਕੋਲ ਸਨ। ਆਤਿਸ਼ੀ ਦਿੱਲੀ ਕੈਬਨਿਟ 'ਚ ਇਕਮਾਤਰ ਮਹਿਲਾ ਮੰਤਰੀ ਹਨ। ਉਹ ਹੁਣ 14 ਵਿਭਾਗ ਸੰਭਾਲੇਗੀ। ਦਿੱਲੀ ਸਰਕਾਰ 'ਚ ਸਭ ਤੋਂ ਵੱਧ ਵਿਭਾਗਾਂ ਦਾ ਚਾਰਜ ਉਨ੍ਹਾਂ ਕੋਲ ਹੈ।