- Updated: August 05, 2026 04:20 PM
ਲੇਬਨਾਨ ਦੇ ਸ਼ੀਆ ਸੰਗਠਨ,ਹਿਜ਼ਬੁੱਲਾ ਨੇ ਇਜ਼ਰਾਈਲ ਨਾਲ ਗੱਲਬਾਤ ਦਾ ਸਮਰਥਨ ਕਰਨ ਵਾਲਿਆਂ ਵਿਰੁੱਧ ਕਾਰਵਾਈ ਕਰਨ ਦੀ ਚੇਤਾਵਨੀ ਦਿੱਤੀ ਹੈ। ਚੇਤਾਵਨੀ ਵਿਚ ਕਿਹਾ ਗਿਆ ਹੈ ਕਿ ਜੋ ਲੋਕ ਇਜ਼ਰਾਈਲੀ ਏਜੰਡੇ ਦਾ ਹਿੱਸਾ ਬਣਨਗੇ ਅਤੇ ਵਿਰੋਧ ਲਹਿਰ ਵਿਰੁੱਧ ਕਦਮ ਚੁੱਕਣਗੇ, ਉਨ੍ਹਾਂ ਦਾ ਵਿਰੋਧ ਕੀਤਾ ਜਾਵੇਗਾ। ਹਿਜ਼ਬੁੱਲਾ ਦੇ ਸਕੱਤਰ ਜਨਰਲ ਨਈਮ ਕਾਸਿਮ ਨੇ ਮੰਗਲਵਾਰ ਨੂੰ ਇੱਕ ਵੀਡੀਓ ਸੰਦੇਸ਼ ਵਿੱਚ ਕਿਹਾ, "ਜਿਹੜੇ ਲੋਕ ਇਜ਼ਰਾਈਲੀ ਪ੍ਰੋਜੈਕਟ ਵਿੱਚ ਸ਼ਾਮਲ ਹੋ ਕੇ ਵਿਰੋਧ, ਇਸਦੇ ਸਮਰਥਕਾਂ ਅਤੇ ਸਾਡੇ ਦੇਸ਼ ਵਿਰੁੱਧ ਕਾਰਵਾਈ ਕਰਨਗੇ ਅਸੀਂ ਉਨ੍ਹਾਂ ਦਾ ਉਂਝ ਹੀ ਮੁਕਾਬਲਾ ਕਰਾਂਗੇ, ਜਿਵੇਂ ਅਸੀਂ ਦੁਸ਼ਮਣ ਨਾਲ ਕਰਦੇ ਹਾਂ।"
ਉਨ੍ਹਾਂ ਨੇ ਲੇਬਨਾਨ ਦੀ ਰਾਜਨੀਤਿਕ ਲੀਡਰਸ਼ਿਪ ਨੂੰ ਇਜ਼ਰਾਈਲ ਨਾਲ ਗੱਲਬਾਤ ਵਿੱਚ ਕਿਸੇ ਵੀ ਵਾਪਸੀ ਦੇ ਬਦਲੇ ਰਿਆਇਤਾਂ ਨਾ ਦੇਣ, ਹਿਜ਼ਬੁੱਲਾ ਨਾਲ ਗੱਲਬਾਤ ਸ਼ੁਰੂ ਕਰਨ, ਅੰਦਰੂਨੀ ਏਕਤਾ ਨੂੰ ਬਹਾਲ ਕਰਨ ਅਤੇ ਰਾਸ਼ਟਰੀ ਪ੍ਰਭੂਸੱਤਾ ਨੂੰ ਸਭ ਤੋਂ ਵੱਧ ਤਰਜੀਹ ਦੇਣ ਦਾ ਸੱਦਾ ਦਿੱਤਾ। ਕਾਸਿਮ ਨੇ ਕਿਹਾ ਕਿ ਹਿਜ਼ਬੁੱਲਾ ਲਿਟਾਨੀ ਨਦੀ ਦੇ ਦੱਖਣ ਵਿੱਚ ਲੇਬਨਾਨੀ ਫੌਜ ਦੀ ਤਾਇਨਾਤੀ ਦਾ ਸਮਰਥਨ ਕਰਦਾ ਹੈ, ਬਸ਼ਰਤੇ ਇਜ਼ਰਾਈਲੀ ਫੌਜ ਲੇਬਨਾਨ ਦੇ ਸਾਰੇ ਖੇਤਰਾਂ ਤੋਂ ਪੂਰੀ ਤਰ੍ਹਾਂ ਪਿੱਛੇ ਹਟ ਜਾਵੇ। ਉਨ੍ਹਾਂ ਕਿਹਾ ਕਿ ਜਿੰਨਾ ਚਿਰ ਦੱਖਣੀ ਲੇਬਨਾਨ ਵਿੱਚ ਹਮਲੇ ਅਤੇ ਤਬਾਹੀ ਜਾਰੀ ਰਹੇਗੀ, ਦੇਸ਼ ਭਰ ਵਿੱਚ ਸਥਿਰਤਾ ਅਸੰਭਵ ਹੈ।
ਲੇਬਨਾਨ ਅਤੇ ਇਜ਼ਰਾਈਲ ਵਿਚਕਾਰ ਗੱਲਬਾਤ ਦਾ ਇੱਕ ਨਵਾਂ ਦੌਰ 4 ਤੋਂ 6 ਅਗਸਤ ਨੂੰ ਇਟਲੀ ਦੀ ਰਾਜਧਾਨੀ ਰੋਮ ਵਿੱਚ ਹੋਣ ਵਾਲਾ ਹੈ। ਲੇਬਨਾਨ ਦੇ ਰਾਸ਼ਟਰਪਤੀ ਜੋਸਫ਼ ਔਨ ਨੇ ਵਾਰ-ਵਾਰ ਕਿਹਾ ਹੈ ਕਿ ਤੇਲ ਅਵੀਵ ਨਾਲ ਗੱਲਬਾਤ ਹੀ ਟਕਰਾਅ ਨੂੰ ਖਤਮ ਕਰਨ ਦਾ ਇੱਕੋ ਇੱਕ ਤਰੀਕਾ ਹੈ। ਹਾਲਾਂਕਿ, ਉਨ੍ਹਾਂ ਨੇ ਇਹ ਵੀ ਸਪੱਸ਼ਟ ਕੀਤਾ ਹੈ ਕਿ ਲੇਬਨਾਨ ਆਪਣੀ ਪ੍ਰਭੂਸੱਤਾ ਅਤੇ ਖੇਤਰੀ ਅਖੰਡਤਾ ਨਾਲ ਸਮਝੌਤਾ ਨਹੀਂ ਕਰੇਗਾ, ਅਤੇ ਇਜ਼ਰਾਈਲੀ ਫੌਜਾਂ ਦੀ ਪੂਰੀ ਵਾਪਸੀ ਉਸਦੀ ਪ੍ਰਮੁੱਖ ਤਰਜੀਹ ਹੈ।