- Updated: July 01, 2025 02:22 PM
ਭੋਪਾਲ ਦੇ ਬਜਾਰੀਆ ਥਾਣਾ ਖੇਤਰ ਵਿਚ, ਇਕ ਵਿਅਕਤੀ ਨੇ ਅਪਣੇ ਲਿਵ-ਇਨ ਪਾਰਟਨਰ ਦਾ ਗਲਾ ਘੁੱਟ ਕੇ ਕਤਲ ਕਰ ਦਿਤਾ। ਇਸ ਤੋਂ ਬਾਅਦ, ਉਸ ਨੇ ਔਰਤ ਦੀ ਲਾਸ਼ ਨੂੰ ਚਾਦਰ ਵਿਚ ਲਪੇਟਿਆ ਅਤੇ ਘਰ ਵਿਚ ਛੱਡ ਦਿਤਾ ਅਤੇ ਚਲਾ ਗਿਆ। ਬਾਅਦ ਵਿਚ, ਸ਼ਰਾਬ ਦੇ ਨਸ਼ੇ ’ਚ ਉਸ ਨੇ ਅਪਣੇ ਦੋਸਤ ਅੱਗੇ ਇਸ ਘਟਨਾ ਦਾ ਪੂਰਾ ਭੇਤ ਦੱਸ ਦਿਤਾ, ਜਿਸ ਨੇ ਪੁਲਿਸ ਨੂੰ ਸੂਚਿਤ ਕੀਤਾ। ਮੁਲਜ਼ਮ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ ਅਤੇ ਜਾਂਚ ਜਾਰੀ ਹੈ।
ਮੱਧ ਪ੍ਰਦੇਸ਼ ਦੇ ਭੋਪਾਲ ਦੇ ਬਜਾਰੀਆ ਥਾਣਾ ਖੇਤਰ ਵਿਚ ਇਕ ਸਨਸਨੀਖ਼ੇਜ਼ ਕਤਲ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਜਿੱਥੇ ਇਕ ਵਿਅਕਤੀ ਨੇ ਅਪਣੇ ਲਿਵ-ਇਨ ਪਾਰਟਨਰ ਦਾ ਕਤਲ ਕਰ ਦਿਤਾ। 27 ਜੂਨ ਨੂੰ ਹੋਏ ਕਤਲ ਤੋਂ ਬਾਅਦ, ਚਾਰ ਦਿਨਾਂ ਬਾਅਦ, ਸੋਮਵਾਰ ਸ਼ਾਮ ਨੂੰ 29 ਸਾਲਾ ਮ੍ਰਿਤਕ ਰਿਤਿਕਾ ਸੇਨ ਦੀ ਲਾਸ਼ ਗਾਇਤਰੀ ਨਗਰ ਦੇ ਇਕ ਘਰ ਤੋਂ ਬਰਾਮਦ ਕੀਤੀ ਗਈ।
ਪਤਾ ਲੱਗਾ ਕਿ ਰਿਤਿਕਾ ਸੇਨ ਅਤੇ ਸਚਿਨ ਰਾਜਪੂਤ ਸਾਢੇ ਤਿੰਨ ਸਾਲਾਂ ਤੋਂ ਲਿਵ-ਇਨ ਵਿਚ ਇਕੱਠੇ ਰਹਿ ਰਹੇ ਸਨ। ਸ਼ੁਕਰਵਾਰ ਰਾਤ ਨੂੰ ਦੋਵਾਂ ਵਿਚਕਾਰ ਕਿਸੇ ਗੱਲ ਨੂੰ ਲੈ ਕੇ ਝਗੜਾ ਹੋ ਗਿਆ ਅਤੇ ਸਚਿਨ ਨੇ ਰਿਤਿਕਾ ਦਾ ਗਲਾ ਘੁੱਟ ਕੇ ਕਤਲ ਕਰ ਦਿਤਾ। ਕਥਿਤ ਤੌਰ 'ਤੇ ਇਸ ਤੋਂ ਬਾਅਦ ਸਚਿਨ ਨੇ ਰਿਤਿਕਾ ਦੀ ਲਾਸ਼ ਨੂੰ ਚਾਦਰ ਵਿਚ ਲਪੇਟਿਆ, ਰੱਸੀ ਨਾਲ ਬੰਨ੍ਹਿਆ ਅਤੇ ਉਸੇ ਕਿਰਾਏ ਦੇ ਘਰ ਵਿਚ ਛੱਡ ਦਿਤਾ ਅਤੇ ਭੱਜ ਗਿਆ।
ਇਸ ਤੋਂ ਬਾਅਦ ਉਹ ਅਪਣੇ ਦੋਸਤ ਕੋਲ ਗਿਆ ਅਤੇ ਸ਼ਰਾਬ ਪੀਣ ਬੈਠ ਗਿਆ, ਫਿਰ ਸ਼ਰਾਬ ਦੇ ਨਸ਼ੇ ’ਚ ਉਸ ਦੇ ਲਿਵ-ਇਨ ਪਾਰਟਨਰ ਦੇ ਕਤਲ ਦੀ ਸੱਚਾਈ ਉਸ ਦੇ ਮੂੰਹੋਂ ਨਿਕਲ ਗਈ, ਪਰ ਦੋਸਤ ਵੀ ਸ਼ਰਾਬ ਦੇ ਨਸ਼ੇ ’ਚ ਸੀ, ਇਸ ਲਈ ਉਸ ਨੇ ਵਿਸ਼ਵਾਸ ਨਹੀਂ ਕੀਤਾ ਪਰ ਅਗਲੇ ਦਿਨ ਜਦੋਂ ਨਸ਼ਾ ਉਤਰਨ ਤੋਂ ਬਾਅਦ ਸਚਿਨ ਨੂੰ ਹੋਸ਼ ਆਇਆ ਤਾਂ ਉਸ ਨੇ ਦੁਬਾਰਾ ਉਸੇ ਦੋਸਤ ਨੂੰ ਸਾਰੀ ਗੱਲ ਦੱਸੀ। ਅਜਿਹੀ ਸਥਿਤੀ ਵਿਚ, ਦੋਸਤ ਨੇ ਮਾਮਲੇ ਦੀ ਗੰਭੀਰਤਾ ਨੂੰ ਸਮਝਦੇ ਹੋਏ ਤੁਰਤ ਪੁਲਿਸ ਨੂੰ ਸੂਚਿਤ ਕੀਤਾ।
ਦੋਸਤ ਦੁਆਰਾ ਦਿਤੀ ਗਈ ਜਾਣਕਾਰੀ 'ਤੇ ਕਾਰਵਾਈ ਕਰਦੇ ਹੋਏ, ਪੁਲਿਸ ਨੇ ਮੁਲਜ਼ਮ ਸਚਿਨ ਰਾਜਪੂਤ ਨੂੰ ਗ੍ਰਿਫ਼ਤਾਰ ਕਰ ਲਿਆ ਅਤੇ ਉਸ ਦੀ ਜਾਣਕਾਰੀ 'ਤੇ ਰਿਤਿਕਾ ਦੀ ਲਾਸ਼ ਵੀ ਬਰਾਮਦ ਕਰ ਲਈ। ਪੁਲਿਸ ਦਾ ਕਹਿਣਾ ਹੈ ਕਿ ਮੌਕੇ ਤੋਂ ਮਹੱਤਵਪੂਰਨ ਸਬੂਤ ਬਰਾਮਦ ਕੀਤੇ ਗਏ ਹਨ ਅਤੇ ਪੂਰੇ ਮਾਮਲੇ ਦੀ ਡੂੰਘਾਈ ਨਾਲ ਜਾਂਚ ਕੀਤੀ ਜਾ ਰਹੀ ਹੈ।