- Updated: February 07, 2023 08:24 PM
ਬਾਲੀਵੁੱਡ ਅਦਾਕਾਰ ਸਿਧਾਰਥ ਮਲਹੋਤਰਾ ਤੇ ਕਿਆਰਾ ਅਡਵਾਨੀ ਅਧਿਕਾਰਤ ਤੌਰ 'ਤੇ ਪਤੀ ਪਤਨੀ ਬਣ ਗਏ ਹਨ। ਦੋਵਾਂ ਨੇ ਜੈਸਲਮੇਰ ਦੇ ਸੂਰਿਆਗੜ੍ਹ ਪੈਲੇਸ ਵਿਖੇ 7 ਫੇਰੇ ਲਏ। ਇਸ ਦੌਰਾਨ ਦੋਵਾਂ ਦੇ ਪਰਿਵਾਰ ਮੈਂਬਰ ਅਤੇ ਕਈ ਬਾਲੀਵੁੱਡ ਸਿਤਾਰੇ ਮੌਜੂਦ ਰਹੇ।
ਸਿਧਾਰਥ ਮਲਹੋਤਰਾ ਅਤੇ ਕਿਆਰਾ ਅਡਵਾਨੀ ਹੁਣ ਵਿਆਹੇ ਹੋਏ ਹਨ। ਵਿੱਕੀ ਕੌਸ਼ਲ-ਕੈਟਰੀਨਾ ਕੈਫ, ਰਣਬੀਰ-ਆਲੀਆ ਅਤੇ ਕੇ. ਐੱਲ. ਰਾਹੁਲ-ਆਥੀਆ ਸ਼ੈੱਟੀ ਵਰਗੇ ਜੋੜਿਆਂ ਦੀ ਤਰ੍ਹਾਂ ਸਿਧਾਰਥ-ਕਿਆਰਾ ਨੇ ਦੁਪਹਿਰ ਨੂੰ ਵਿਆਹ ਕਰਵਾ ਲਿਆ। ਜੋੜੇ ਨੇ ਆਪਣੇ ਵਿਆਹ ਨੂੰ ਗੁਪਤ ਰੱਖਿਆ ਅਤੇ ਜਿੱਥੇ ਉਹ ਵਿਆਹ ਕਰ ਰਹੇ ਸਨ, ਉੱਥੇ ਮਹਿਮਾਨਾਂ ਲਈ ਨੋ-ਫੋਨ ਨੀਤੀ ਲਾਗੂ ਸੀ। ਯਾਨੀਕਿ ਕਿਸੇ ਨੂੰ ਪੈਲੇਸ ਅੰਦਰ ਵਿਆਹ ਦੌਰਾਨ ਫੋਨ ਲਿਜਾਣ ਦੀ ਇਜਾਜ਼ਤ ਨਹੀਂ ਸੀ।
ਦੱਸ ਦਈਏ ਕਿ ਫ਼ਿਲਮ 'ਸ਼ੇਰ ਸ਼ਾਹ' ਦੀ ਆਨ-ਸਕਰੀਨ ਕੈਮਿਸਟਰੀ ਨਾਲ ਪ੍ਰਸ਼ੰਸਕਾਂ ਨੂੰ ਦੀਵਾਨਾ ਬਣਾਉਣ ਵਾਲੀ ਇਹ ਜੋੜੀ ਅਸਲ ਜ਼ਿੰਦਗੀ 'ਚ ਵੀ ਜੋੜੀ ਬਣ ਗਈ ਹੈ। ਫ਼ਿਲਮ ਦੀ ਸ਼ੂਟਿੰਗ ਦੌਰਾਨ ਦੋਵੇਂ ਨੇੜੇ ਆਏ ਅਤੇ ਦੋਵਾਂ ਨੂੰ ਇੱਕ ਦੂਜੇ ਨਾਲ ਪਿਆਰ ਹੋ ਗਿਆ। ਉਨ੍ਹਾਂ ਨੇ ਆਪਣੇ ਵਿਆਹ ਲਈ ਜੈਸਲਮੇਰ ਦੇ ਸੂਰਿਆਗੜ੍ਹ ਪੈਲੇਸ ਨੂੰ ਚੁਣਿਆ, ਜਿਸ 'ਚ ਉਨ੍ਹਾਂ ਦੇ ਪਰਿਵਾਰ ਅਤੇ ਇੰਡਸਟਰੀ ਦੇ ਕਰੀਬੀ ਦੋਸਤਾਂ ਨੇ ਸ਼ਿਰਕਤ ਕੀਤੀ।
ਦੱਸਣਯੋਗ ਹੈ ਕਿ 6 ਫਰਵਰੀ ਨੂੰ ਸੰਗੀਤ ਕੀ ਰਾਤ ਤੋਂ ਪਹਿਲਾਂ ਸਿਧਾਰਥ-ਕਿਆਰਾ ਦੀ ਰੋਕਾ ਅਤੇ ਚੂੜਾ ਦੀ ਰਸਮ ਹੋਈ ਸੀ। ਰੋਕਾ ਦੋ ਪਰਿਵਾਰਾਂ ਦੇ ਏਕਤਾ ਦੇ ਪ੍ਰਤੀਕ ਵਜੋਂ ਜਾਣਿਆ ਜਾਂਦਾ ਹੈ। ਸਮਾਰੋਹ 'ਚ ਸਿਧਾਰਥ ਅਤੇ ਕਿਆਰਾ ਦੇ ਮਾਤਾ-ਪਿਤਾ ਦੋਵੇਂ ਮੌਜੂਦ ਸਨ। ਇਸ ਤੋਂ ਬਾਅਦ ਅਦਾਕਾਰਾ ਦੀ ਚੂੜਾ ਸੈਰੇਮਨੀ ਵੀ ਹੋਈ। ਸੰਗੀਤ ਕੀ ਰਾਤ ਲਈ ਸੂਰਜਗੜ੍ਹ ਪੈਲੇਸ ਨੂੰ ਬੀਤੀ ਰਾਤ ਗੁਲਾਬੀ ਥੀਮ ਨਾਲ ਸਜਾਇਆ ਗਿਆ ਸੀ। ਉਨ੍ਹਾਂ ਦੇ ਵਿਆਹ 'ਚ ਵੱਡੇ-ਵੱਡੇ ਸਿਤਾਰਿਆਂ ਤੋਂ ਲੈ ਕੇ ਕਾਰੋਬਾਰੀ ਜਗਤ ਦੀਆਂ ਮਸ਼ਹੂਰ ਹਸਤੀਆਂ ਨੇ ਸ਼ਿਰਕਤ ਕੀਤੀ।