- Updated: April 05, 2024 02:45 PM
ਅਮਰੀਕਾ ਦੇ ਟੈਕਸਾਸ ਸੂਬੇ ਵਿਚ ਭਾਰਤੀ ਮੂਲ ਦੇ ਇਕ ਵਿਅਕਤੀ ਨੇ ਇਕ ਹਿੰਦੂ ਮੰਦਰ ਅਤੇ ਉਸ ਨਾਲ ਸਬੰਧਤ ਕੰਪਨੀ ਖਿਲਾਫ 10 ਲੱਖ ਅਮਰੀਕੀ ਡਾਲਰ ਤੋਂ ਵੱਧ ਦੇ ਹਰਜਾਨੇ ਦੀ ਮੰਗ ਕਰਦੇ ਹੋਏ ਮੁਕੱਦਮਾ ਦਾਇਰ ਕੀਤਾ ਹੈ। 2023 ਵਿੱਚ ਇੱਕ ਧਾਰਮਿਕ ਸਮਾਰੋਹ ਦੌਰਾਨ ਵਿਅਕਤੀ ਦੇ 11 ਸਾਲਾ ਪੁੱਤਰ ਨੂੰ ਲੋਹੇ ਦੀ ਗਰਮ ਰਾਡ ਨਾਲ ਦਾਗਿਆ ਗਿਆ ਸੀ। ਫੋਰਟ ਬੇਂਡ ਕਾਉਂਟੀ ਨਿਵਾਸੀ ਵਿਜੇ ਚੇਰੂਵੂ ਨੇ ਕਿਹਾ ਕਿ ਪਿਛਲੇ ਸਾਲ ਅਗਸਤ ਵਿੱਚ ਟੈਕਸਾਸ ਦੇ ਸ਼ੂਗਰਲੈਂਡ ਵਿੱਚ ਸ਼੍ਰੀ ਅਸ਼ਟਲਕਸ਼ਮੀ ਹਿੰਦੂ ਮੰਦਰ ਵਿੱਚ ਇੱਕ ਧਾਰਮਿਕ ਸਮਾਰੋਹ ਦੌਰਾਨ ਉਸਦੇ ਪੁੱਤਰ ਨੂੰ ਲੋਹੇ ਦੀ ਗਰਮ ਰਾਡ ਨਾਲ ਦਾਗਿਆ ਗਿਆ ਸੀ।
ਫੋਰਟ ਬੇਂਡ ਕਾਉਂਟੀ ਵਿੱਚ ਇਸ ਹਫ਼ਤੇ ਦਾਇਰ ਕੀਤੇ ਗਏ ਇੱਕ ਮੁਕੱਦਮੇ ਦੇ ਅਨੁਸਾਰ, ਲੜਕੇ ਨੂੰ ਬਹੁਤ ਜ਼ਿਆਦਾ ਦਰਦ ਹੋਇਆ ਸੀ ਅਤੇ ਉਸ ਦੀ ਉਸ ਥਾਂ ਵਾਲੀ ਚਮੜੀ ਖਰਾਬ ਹੋ ਗਈ ਸੀ। ਮੰਦਰ ਅਤੇ ਉਸ ਦੇ ਮੂਲ ਸੰਗਠਨ, ਜੀਰ ਐਜੂਕੇਸ਼ਨਲ ਟਰੱਸਟ (ਜੇ.ਈ.ਟੀ.) ਯੂ.ਐੱਸ.ਏ., ਇੰਕ. ਵਿਰੁੱਧ ਮੁਕੱਦਮੇ ਵਿੱਚ ਚੇਰੂਵੂ 10 ਲੱਖ ਅਮਰੀਕੀ ਡਾਲਰ ਤੋਂ ਵੱਧ ਦੇ ਹਰਜਾਨੇ ਦੀ ਮੰਗ ਕਰ ਰਹੇ ਹਨ। ਚੇਰੂਵੂ ਨੇ ਇੱਥੇ ਪ੍ਰੈੱਸ ਕਾਨਫਰੰਸ ਦੌਰਾਨ ਕਿਹਾ,'ਮੈਂ ਹੈਰਾਨ ਰਹਿ ਗਿਆ। ਮੈਨੂੰ ਨਹੀਂ ਪਤਾ ਸੀ ਕਿ ਉਸ ਨਾਲ ਕਿਵੇਂ ਨਜਿੱਠਣਾ ਹੈ। ਮੇਰੀ ਮੁੱਖ ਚਿੰਤਾ ਮੇਰੇ ਪੁੱਤਰ ਦੀ ਤੰਦਰੁਸਤੀ ਹੈ।' ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਦੇ ਪੁੱਤਰ ਦੇ ਮੋਢੇ 'ਤੇ ਗਰਮ ਰਾਡ ਨਾਲ ਦਾਗਦੇ ਹੋਏ ਦੋ ਥਾਵਾਂ 'ਤੇ ਭਗਵਾਨ ਵਿਸ਼ਨੂੰ ਦੀ ਮੂਰਤੀ ਬਣਾਈ ਗਈ ਸੀ।
ਮੁਕੱਦਮੇ ਵਿਚ ਦਾਅਵਾ ਕੀਤਾ ਗਿਆ ਹੈ ਕਿ ਅਗਸਤ ਵਿਚ ਸ਼ੂਗਰਲੈਂਡ ਵਿਚ ਸਿਨੋਟ ਰੋਡ 'ਤੇ ਅਸ਼ਟਲਕਸ਼ਮੀ ਮੰਦਰ ਵਿਚ ਆਯੋਜਿਤ ਸਮਾਰੋਹ ਵਿਚ 100 ਤੋਂ ਵੱਧ ਲੋਕ ਸ਼ਾਮਲ ਹੋਏ ਸਨ। ਉਨ੍ਹਾਂ ਭਾਗੀਦਾਰਾਂ ਵਿੱਚੋਂ 3 ਬੱਚੇ ਸਨ, ਜਿਨ੍ਹਾਂ ਵਿੱਚ ਚੇਰੂਵੂ ਦਾ ਪੁੱਤਰ ਵੀ ਸ਼ਾਮਲ ਸੀ। ਚੇਰੂਵੂ ਦੇ ਅਟਾਰਨੀ ਬ੍ਰੈਂਟ ਸਟੋਗਨਰ ਨੇ ਕਿਹਾ ਕਿ ਲੜਕੇ ਦੇ ਦੋਵੇਂ ਮੋਢਿਆਂ 'ਤੇ ਜ਼ਖ਼ਮ ਹਨ, ਜਿਸ ਦੇ ਨਤੀਜੇ ਵਜੋਂ ਬਹੁਤ ਜ਼ਿਆਦਾ ਦਰਦ ਅਤੇ ਬਾਅਦ ਵਿੱਚ ਸੰਕਰਮਣ ਹੋਇਆ। ਸਟੋਗਨਰ ਦੇ ਅਨੁਸਾਰ, ਲੜਕਾ ਆਪਣੀ ਮਾਂ ਦੇ ਨਾਲ ਸਮਾਰੋਹ ਵਿੱਚ ਸ਼ਾਮਲ ਹੋਇਆ ਸੀ ਅਤੇ ਉਸਨੂੰ ਉਸਦੀ ਇੱਛਾ ਦੇ ਵਿਰੁੱਧ ਅਤੇ ਉਸਦੇ ਪਿਤਾ ਦੀ ਜਾਣਕਾਰੀ ਜਾਂ ਸਹਿਮਤੀ ਤੋਂ ਬਿਨਾਂ ਦਾਗਿਆ ਗਿਆ ਸੀ। ਟੈਕਸਾਸ ਵਿੱਚ ਮਾਤਾ-ਪਿਤਾ ਦੀ ਸਹਿਮਤੀ ਨਾਲ ਵੀ ਬੱਚੇ ਨੂੰ ਦਾਗਣਾ, ਟੈਟੂ ਬਣਾਉਣਾ ਗੈਰ-ਕਾਨੂੰਨੀ ਹੈ। ਸੰਪਰਕ ਕਰਨ 'ਤੇ ਮੰਦਰ ਵੱਲੋਂ ਕੋਈ ਜਵਾਬ ਨਹੀਂ ਆਇਆ।