- Updated: August 23, 2022 05:32 PM
ਬ੍ਰਿਟਿਸ਼ ਏਅਰਵੇਜ਼ ਨੇ ਸੋਮਵਾਰ ਨੂੰ ਹੀਥਰੋ ਹਵਾਈ ਅੱਡੇ 'ਤੇ ਹਜ਼ਾਰਾਂ ਉਡਾਣਾਂ ਨੂੰ ਰੱਦ ਕਰਨ ਦਾ ਐਲਾਨ ਕੀਤਾ। ਬ੍ਰਿਟਿਸ਼ ਏਅਰਵੇਜ਼ ਨੇ ਕਿਹਾ ਹੈ ਕਿ ਉਹ ਅਕਤੂਬਰ 2022 ਤੋਂ ਮਾਰਚ 2023 ਦੇ ਵਿਚਕਾਰ ਲੰਡਨ ਦੇ ਹੀਥਰੋ ਹਵਾਈ ਅੱਡੇ ਤੋਂ ਲਗਭਗ 10,000 ਛੋਟੀ ਦੂਰੀ ਦੀਆਂ ਉਡਾਣਾਂ ਨੂੰ ਮੁਅੱਤਲ ਕਰ ਦੇਵੇਗੀ। ਡੀਪੀਏ ਦੀ ਰਿਪੋਰਟ ਮੁਤਾਬਕ ਇਸ ਯੋਜਨਾ ਕਾਰਨ ਲੰਬੀ ਦੂਰੀ ਦੀਆਂ ਕੁਝ ਉਡਾਣਾਂ ਵੀ ਪ੍ਰਭਾਵਿਤ ਹੋਣਗੀਆਂ। ਫਲੈਗ ਕੈਰੀਅਰ ਦੇ ਅਨੁਸਾਰ, ਇਸ ਕਦਮ ਦਾ ਉਦੇਸ਼ ਸਰਦੀਆਂ ਦੇ ਮਹੀਨਿਆਂ ਦੌਰਾਨ ਕੈਂਸਲੇਸ਼ਨ ਅਤੇ ਦੇਰ ਵਰਗੇ ਮਾਮਲਿਆਂ ਨੂੰ ਘੱਟ ਕਰਨਾ ਹੈ।
ਕੰਪਨੀ ਨੇ ਕਿਹਾ ਅਕਤੂਬਰ ਦੇ ਅੰਤ ਤੱਕ, ਪ੍ਰਤੀ ਦਿਨ ਰਾਊਂਡ-ਟਰਿੱਪ ਉਡਾਣਾਂ ਅਤੇ ਲਗਭਗ 629 ਉਡਾਣਾਂ ਨੂੰ ਵੀ ਰੱਦ ਕੀਤਾ ਜਾਣਾ ਹੈ। ਏਅਰਲਾਈਨ ਦੀ ਯੋਜਨਾ ਛੁੱਟੀਆਂ ਦੇ ਸੀਜ਼ਨ ਵਿਚ ਬਿਨਾਂ ਰੋਕ ਆਵਾਜਾਈ ਦੇ ਕਨੈਕਸ਼ਨ ਬਣਾਏ ਰੱਖਣ ਦੀ ਹੈ। ਏਅਰਲਾਈਨ ਨੇ ਕਿਹਾ ਕਿ ਜ਼ਿਆਦਾਤਰ ਰੱਦ ਕਰਨ ਦਾ ਐਲਾਨ ਪਹਿਲਾਂ ਹੀ ਕਰ ਦਿੱਤਾ ਜਾਵੇਗਾ, ਜਿਸ ਨਾਲ ਯਾਤਰੀਆਂ ਨੂੰ ਹੋਰ ਉਡਾਣਾਂ 'ਤੇ ਜਾਣ ਦਾ ਵਿਕਲਪ ਮਿਲ ਸਕੇਗਾ। ਇਸ ਤੋਂ ਪਹਿਲਾਂ ਵੀ ਬ੍ਰਿਟਿਸ਼ ਏਅਰਵੇਜ਼ ਨੇ ਕਰੀਬ 30,000 ਫਲਾਈਟਾਂ ਨੂੰ ਰੱਦ ਕੀਤਾ ਸੀ।
ਦੱਸਿਆ ਜਾ ਰਿਹਾ ਹੈ ਕਿ ਗਰਮੀਆਂ ਦੇ ਸ਼ੈਡਿਊਲ ਤੋਂ 29 ਅਕਤੂਬਰ ਤੱਕ 600 ਤੋਂ ਵੱਧ ਵਾਪਸੀ ਦੀਆਂ ਉਡਾਣਾਂ ਰੱਦ ਹੋਣਗੀਆਂ। ਇਸ ਦੇ ਨਾਲ ਹੀ ਅਗਲੇ ਸਾਲ ਮਾਰਚ ਦੇ ਅੰਤ ਤੱਕ ਚੱਲਣ ਵਾਲੇ ਸਰਦੀਆਂ ਦੇ ਸ਼ਡਿਊਲ 'ਚ 8 ਫੀਸਦੀ ਦੀ ਕਟੌਤੀ ਕੀਤੀ ਜਾਵੇਗੀ। ਉਡਾਣਾਂ ਰੱਦ ਕਰਨ ਦੇ ਨਾਲ, ਏਅਰਲਾਈਨ ਨੂੰ ਟਰਮੀਨਲ 'ਤੇ ਯਾਤਰੀਆਂ ਦੇ ਬੈਕਲਾਗ ਨੂੰ ਸਾਫ਼ ਕਰਨ ਲਈ ਯਾਤਰੀਆਂ ਨੂੰ ਘੱਟ ਟਿਕਟਾਂ ਵੇਚਣ ਦੀ ਬੇਨਤੀ ਕੀਤੀ ਗਈ ਹੈ।
ਦੱਸ ਦਈਏ ਕਿ ਇਸ ਤੋਂ ਪਹਿਲਾਂ ਹੀਥਰੋ ਏਅਰਪੋਰਟ ਨੇ ਸਟਾਫ ਦੀ ਕਮੀ ਨਾਲ ਨਜਿੱਠਣ ਲਈ 12 ਜੁਲਾਈ ਤੋਂ 11 ਸਤੰਬਰ ਤੱਕ ਹਵਾਈ ਅੱਡੇ 'ਤੇ ਯਾਤਰੀਆਂ ਦੀ ਗਿਣਤੀ ਪ੍ਰਤੀ ਦਿਨ ਇਕ ਲੱਖ ਤੱਕ ਸੀਮਤ ਕਰਨ ਦਾ ਫੈਸਲਾ ਕੀਤਾ ਹੈ। ਪਰ ਹੁਣ ਇਹ ਤਰੀਕ ਵਧਾ ਦਿੱਤੀ ਗਈ ਹੈ। ਇਸ ਗਰਮੀ ਵਿੱਚ ਹਜ਼ਾਰਾਂ ਉਡਾਣਾਂ ਪਹਿਲਾਂ ਹੀ ਰੱਦ ਹੋ ਚੁੱਕੀਆਂ ਹਨ। ਉਦਯੋਗ ਸਟਾਫ ਦੀ ਕਮੀ ਦੇ ਵਿਚਕਾਰ ਹਵਾਈ ਯਾਤਰਾ ਦੀ ਮੰਗ ਨੂੰ ਪੂਰਾ ਕਰਨ ਲਈ ਸੰਘਰਸ਼ ਕਰ ਰਿਹਾ ਹੈ।