- Updated: January 02, 2025 02:22 PM
ਨਵੇਂ ਸਾਲ ਵਿਚ ਵੀ ਕੈਨੇਡਾ ਦੇ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦੀਆਂ ਮੁਸ਼ਕਲਾਂ ਘੱਟ ਹੁੰਦੀਆਂ ਨਹੀਂ ਜਾਪਦੀਆਂ। 2025 ਦੀ ਸ਼ੁਰੂਆਤ ਵਿਚ ਹੀ ਟਰੂਡੋ ਦੀ ਲੀਡਰਸ਼ਿਪ ਅੱਧ ਵਿਚਾਲੇ ਲਟਕ ਰਹੀ ਹੈ ਕਿਉਂਕਿ ਉਨ੍ਹਾਂ ਦੀ ਮੁੱਖ ਸਹਿਯੋਗੀ ਨਿਊ ਡੈਮੋਕ੍ਰੇਟਿਕ ਪਾਰਟੀ (ਐਨ.ਡੀ.ਪੀ) ਦੇ ਆਗੂ ਜਗਮੀਤ ਸਿੰਘ ਨੇ ਕਿਹਾ ਹੈ ਕਿ ਉਹ ਘੱਟ ਗਿਣਤੀ ਲਿਬਰਲ ਸਰਕਾਰ ਨੂੰ ਡੇਗਣ ਲਈ ਇੱਕ ਮਤਾ ਪੇਸ਼ ਕਰਨਗੇ। ਅਜਿਹਾ ਉਦੋਂ ਹੋ ਰਿਹਾ ਹੈ ਜਦੋਂ ਜਗਮੀਤ ਸਿੰਘ ਨੇ ਕਿਹਾ ਕਿ ਉਹ ਟਰੂਡੋ ਦੀ ਅਗਵਾਈ ਵਾਲੀ ਲਿਬਰਲ ਸਰਕਾਰ ਤੋਂ ਵਿਸ਼ਵਾਸ ਗੁਆਉਣ ਦਾ ਐਲਾਨ ਕਰੇਗਾ। ਜੇਕਰ ਹੋਰ ਵਿਰੋਧੀ ਪਾਰਟੀਆਂ ਉਨ੍ਹਾਂ ਦੇ ਇਸ ਕਦਮ ਦਾ ਸਮਰਥਨ ਕਰਦੀਆਂ ਹਨ ਤਾਂ ਚੋਣਾਂ ਜਲਦੀ ਹੀ ਹੋ ਸਕਦੀਆਂ ਹਨ।
ਜਗਮੀਤ ਸਿੰਘ ਨੇ ਪਹਿਲਾਂ ਕਿਹਾ ਸੀ ਕਿ ਜਸਟਿਨ ਟਰੂਡੋ ਨੂੰ "ਇੱਕ ਹੋਰ ਮੌਕਾ" ਨਹੀਂ ਦਿੱਤਾ ਜਾਣਾ ਚਾਹੀਦਾ, ਜਿਸ ਕਾਰਨ "ਐਨ.ਡੀ.ਪੀ ਇਸ ਸਰਕਾਰ ਨੂੰ ਹਟਾਉਣ ਲਈ ਵੋਟ ਕਰੇਗੀ ਅਤੇ ਕੈਨੇਡੀਅਨਾਂ ਨੂੰ ਅਜਿਹੀ ਸਰਕਾਰ ਲਈ ਵੋਟ ਪਾਉਣ ਦਾ ਮੌਕਾ ਦੇਵੇਗੀ ਜੋ ਉਨ੍ਹਾਂ ਲਈ ਕੰਮ ਕਰੇਗੀ।" ਦੂਜੇ ਪਾਸੇ ਹੁਣ ਕਿਊਬਿਕ ਦੇ ਸੰਸਦ ਮੈਂਬਰ ਵੀ ਚਾਹੁੰਦੇ ਹਨ ਕਿ ਜਸਟਿਨ ਟਰੂਡੋ ਨੇਤਾ ਦੇ ਅਹੁਦੇ ਤੋਂ ਹਟ ਜਾਣ। ਕਿਊਬਿਕ ਕਾਕਸ ਦੀ ਚੇਅਰ ਸਟੀਫਨ ਲੌਜ਼ਨ ਨੇ ਇਸ 'ਤੇ ਸੰਸਦ ਮੈਂਬਰਾਂ ਨਾਲ ਸਲਾਹ ਕੀਤੀ ਅਤੇ ਕਿਹਾ, "ਕਿਊਬਿਕ ਕਾਕਸ ਦੀ ਤਰਫੋਂ ਪ੍ਰਧਾਨ ਮੰਤਰੀ ਨੂੰ ਕੋਈ ਪੱਤਰ ਨਹੀਂ ਭੇਜਿਆ ਗਿਆ ਹੈ। ਬਦਕਿਸਮਤੀ ਨਾਲ ਕਿਊਬਿਕ ਕਾਕਸ ਵਿੱਚ ਜੋ ਹੁੰਦਾ ਹੈ, ਉਹ ਕਾਕਸ ਵਿੱਚ ਰਹਿੰਦਾ ਹੈ।" ਸੀ.ਬੀ.ਸੀ ਨਿਊਜ਼ ਅਨੁਸਾਰ ਕਿਊਬਿਕ ਦੇ ਇੱਕ ਲਿਬਰਲ ਸੰਸਦ ਮੈਂਬਰ ਨੇ ਕਿਹਾ ਕਿ ਉਨ੍ਹਾਂ ਵਿੱਚ ਸਹਿਮਤੀ ਇਹ ਹੈ ਕਿ ਜਸਟਿਨ ਟਰੂਡੋ ਨੂੰ ਅਹੁਦਾ ਛੱਡ ਦੇਣਾ ਚਾਹੀਦਾ ਹੈ।
ਇਕ ਹੋਰ ਸੰਸਦ ਮੈਂਬਰ ਅਲੈਗਜ਼ੈਂਡਰਾ ਮੇਂਡੇਜ਼ ਨੇ ਕਿਹਾ ਕਿ ਉਹ ਕਾਕਸ ਦੀ ਸਹਿਮਤੀ ਨੂੰ ਸਮਝਦੀ ਹੈ ਕਿ "ਪ੍ਰਧਾਨ ਮੰਤਰੀ ਨੂੰ ਅਹੁਦਾ ਛੱਡ ਦੇਣਾ ਚਾਹੀਦਾ ਹੈ।" ਉਸ ਨੇ ਕਿਹਾ, “ਇਹ ਉਹ ਸਹਿਮਤੀ ਹੈ ਜੋ ਕਾਕਸ ਪ੍ਰਧਾਨ ਨੂੰ ਦੱਸੀ ਗਈ ਸੀ ਅਤੇ ਉਹ ਰਾਸ਼ਟਰੀ ਕਾਕਸ ਨੂੰ ਕੀ ਦੱਸਣਾ ਚਾਹੁੰਦੇ ਸਨ।” ਜਸਟਿਨ ਟਰੂਡੋ ਨੇ ਨਵੇਂ ਸਾਲ 'ਤੇ ਇੱਕ ਇੰਟਰਵਿਊ ਵਿੱਚ ਕਿਹਾ, "ਅਸੀਂ ਇਸ ਸਮੇਂ ਉਸ ਪਲ ਵਿੱਚ ਹਾਂ ਜਿੱਥੇ ਸਭ ਕੁਝ ਮੁਸ਼ਕਲ ਹੈ ਅਤੇ Pierre Poilievre ਕੈਨੇਡੀਅਨਾਂ ਨੂੰ ਯਕੀਨ ਦਿਵਾਉਣ ਦੀ ਕੋਸ਼ਿਸ਼ ਕਰ ਰਿਹਾ ਹੈ ਕਿ ਉਹ ਆਪਣੇ ਆਪ ਵਿੱਚ ਵਿਸ਼ਵਾਸ ਨਾ ਕਰਨ, ਜਲਵਾਯੂ ਤਬਦੀਲੀ ਵਿੱਚ ਵਿਸ਼ਵਾਸ ਨਾ ਕਰਨ, ਬੰਦੂਕ ਦੇ ਨਿਯੰਤਰਣ ਵਿੱਚ ਵਿਸ਼ਵਾਸ ਨਾ ਕਰਨ, ਔਰਤਾਂ ਵਿੱਚ ਵਿਸ਼ਵਾਸ ਨਾ ਕਰਨ। ਮੇਰਾ ਮੰਨਣਾ ਹੈ ਕਿ ਕੈਨੇਡੀਅਨ ਇਸ ਮੌਕੇ 'ਤੇ ਅੱਗ ਵਧ ਗਏ ਹਨ ਅਤੇ ਮੈਂ ਨਿਸ਼ਚਤ ਤੌਰ 'ਤੇ ਇਸ ਸਮੇਂ ਲੜਨਾ ਬੰਦ ਨਹੀਂ ਕਰਾਂਗਾ ਜਿੱਥੇ ਇਹ ਬਹੁਤ ਮਹੱਤਵਪੂਰਨ ਹੈ।''